विराटनगरः मोरङका १७ वटा स्थानीय तहमध्ये कानेपोखरी गाउँपालिकाको मतगणना सुरु भएको छ । सर्वदलीय बैठकले वडा नम्बर ७ बाट गणना सुरु गर्ने सहमति गरेको हो ।
कानेपोखरीमा ३४ हजार ४५ मतदाता मध्ये ६६ प्रतिशत अर्थात २२ हजार ७३१ मत खसेको निर्वाचन अधिकृत गणेश नायकले जानकारी दिए । मतगणना सुरु हुनु अघि बसेको सर्वदलीय बैठकले हरेक १०० मत गन्दा मत परिणाम सार्वजनिक गर्ने निर्णय गरेको जनाइएको छ ।
प्राप्त मतगणना विवरण अनुसार कानेपोखरीमा ८०० मत गनिसक्दा एमालेका उम्मेदवारहरुको अग्रता देखिएको छ । अध्यक्षमा एमालेकी राजमति इङ्नामको ३०१ र उपाध्यक्षमा भोला अधिकारीले ३१८ मत प्राप्त गरेका हुन् ।
नेपाली कांग्रेसका उम्मेदवारतर्फ अध्यक्षमा १८४, उपाध्यक्षमा २२८ तथा नेकपा माओवादी केन्द्रबाट अध्यक्षतर्फ १२९, उपाध्यक्षमा २३८ मत प्राप्त भएको छ ।
यस्तै उर्लाबारी नगरपालिकामा पनि एमालेले अग्रता लिएको छ ।
ग्रामथान र मिक्लाजुङ गाउँपालिकामा भने नेपाली कांग्रेसले अग्रता लिएको छ ।
प्रारम्भिक मतपरिणाम अनुसार ग्रामथानको अध्यक्षमा कांग्रेसका जयप्रकाश गच्छदार थारुले ८७ र एमालेका शिवनारायण माझी थारुले ५४ मत ल्याएका छन् । उपाध्यक्षमा कांग्रेसकी भुखनीकुमारी थारुले ६८ र एमालेकी गुणवतीदेवी थारुले ६४ मत ल्याएका छन् ।
मिक्लाजुङको अध्यक्षमा कांग्रेसका बबिकुमार राईले १०५ र एमालेका नरेन्द्रप्रसाद ढुंगेलले ७९ मत ल्याएका छन् । उपाध्यक्षमा माओवादीका दिनेश पौडेलले ७२ र एमालेकी निर्मला राईले २४ मत ल्याएका छन् ।
