दमक । स्थानीय तहको निर्वाचनअन्तर्गत झापाको दमक नगरपालिकामा राष्ट्रिय प्रजातन्त्र पार्टी (राप्रपा) बाट मेयर उम्मेदवार राम थापा अस्पताल भर्ना भएका छन् ।
उनलाई धरानस्थित विपी कोइराला स्वास्थ्य विज्ञान प्रतिष्ठानमा भर्ना गरिएको छ । बिहीबार उनलाई स्वास्थ्यमा समस्या आएपछि प्रतिष्ठानमा भर्ना गरिएको हो । प्रतिष्ठानले उनलाई एपेन्डिसाइटिस भएको बताएको छ । उनको आजै अपरेसन हुने बताइएको छ ।
यसैबीच राप्रपाका केन्द्रीय अध्यक्ष राजेन्द्र लिङ्देनले थापाको शीघ्र स्वास्थ्यलाभको कामना गर्नुभएको छ । सामाजिक सञ्जालमार्फत अध्यक्ष लिङ्देनले स्वास्थ्यलाभको कामना गर्दै सबै शुभेच्छुकलाई धैर्य धारण गर्न अनुरोध गर्नुभएको छ ।
राप्रपाबाट मेयरमा उम्मेदवार बन्नुभएका थापालाई पाँच दलीय गठबन्धनको समर्थन छ ।
