काठमाडौँ । सरकारले आफूहरुभन्दा कनिष्ठ प्रहरी अतिरिक्त महानिरीक्षक (एआईजी) लाई महानिरीक्षक (आईजीपी) बनाएपछि दुई जना वरिष्ठ अतिरिक्त महानिरीक्षक (एआईजी) अदालत जाने भएका छन् ।
आइतबार बसेको मन्त्रिपरिषद्को बैठकले आफूहरुभन्दा १६ महिना कनिष्ठ एआईजी धीरजप्रताप सिंहलाई आईजीपी बनाएपछि वरिष्ठ एआईजीहरु विश्वराज पोखरेल र सहकुल थापा सर्वोच्च अदालत जाने तयारीसँगै परामर्शमा जुटेका छन् ।
अदालत खुल्नासाथ सरकारको निर्णय कार्यान्वयन नगर्न र आफूहरुलाई आईजीपीमा नियुक्त गर्न माग गर्दै रिट दर्ता गर्ने तयारी गरेको बताइएको छ ।
केपी शर्मा ओली नेतृत्वको सरकारले पोखरेललाई २०७७ मङ्सिर २५ मा एआईजीमा बढुवा गरेको थियो । थापा गत असार २४ मा तथा सिंह गत चैतमा एआईजीमा नियुक्त भएका थिए ।
