काठमाडौं । परराष्ट्रमन्त्री डा. नारायण खड्का नेपालका लागि महत्वपूर्ण रही आएको एक कूटनीतिक फोरममा उपस्थित नभएर चुनाव प्रचारका लागि जिल्ला गएका छन् । उनी भारतको स्थापित चिन्तन संस्था अब्जर्भर रिसर्च फाउन्डेसन (ओआरएफ)द्वारा आयोजित रायसिना डायलग बहस शृंखलामा उपस्थित नभएका हुन् ।
वर्सेनि नेपालका परराष्ट्रमन्त्री उपस्थित हुने गरेको यो वार्षिक फोरममा अन्तिम समयमा आएर मन्त्री खड्का अनुपस्थित भएका हुन् । भूराजनीति र भूअर्थनीतिका समसामयिक क्षेत्रीय विषयमा सो फोरममा छलफल हुने गर्दछ । भारतीय विदेश मन्त्रालयको संलग्नतामा रायसिना डायलगमा बहस हुँदै आएको छ । यो क्षेत्रीय फोरम रहेकाले नेपालजस्ता देशका लागि निकै महत्वपूर्ण हुने गर्दछ ।
तर पनि यति महत्वपूर्ण सम्मेलनमा नगएर उनले स्थानीय निर्वाचनमा गृहजिल्ला उदयपुर जानुपर्ने बाध्यता देखाएर अन्तिम समयमा भ्रमण रद्द गरेका छन् । कार्यक्रममा राष्ट्रिय योजना आयोगका उपाध्यक्ष डा विश्वनाथ पौडेलले सहभागिता जनाएका छन् । जबकि त्यो फोरम कुनै आर्थिक नभएर नेपाल–भारत सम्बन्धका विभिन्न विषयमा विशेष सम्बोधन गर्ने गरी नेपालको विदेश मन्त्रीलाई नै निमन्त्रणा दिने गरिएको हुन्छ ।
नेपालको कूटनीतिक क्षेत्रका जानकारहरुले यो क्षेत्रको सबैभन्दा ठूलो कूटनीतिक जमघटमा परराष्ट्रमन्त्रीको अनुपस्थिति मुलुकको हितमा नभएको टिप्प्णी गरेका छन् । रायसिना डायलग सोमबारदेखि बुधबारसम्म नयाँदिल्लीमा आयोजना भएको थियो । कार्यक्रममा सहभागी हुन स्विडेनका पूर्वप्रधानमन्त्री कार्ल बिल्ड्ट, क्यानडाका पूर्वप्रधानमन्त्री स्टेफेन हार्पर, अस्ट्रेलियाका पूर्वप्रधानमन्त्री एन्थोनी अब्बोटसहित नर्वे, पोर्चुगल, स्लोभानिया, अरमेनिया, लक्जेमबर्ग, लिथुवानियाका परराष्ट्रमन्त्री सहभागी थिए ।
आयोजकले नेपालका परराष्ट्रमन्त्रीको एकल छलफल कार्यक्रमको तयारी गरेको थियो भने भारतीय विदेशमन्त्री डा एस जयशंकरसँग परराष्ट्रमन्त्री खड्काको द्विपक्षीय वार्ताका लागि पनि पहल भइरहेको थियो । तर मन्त्री खड्का भने यता नभएर आफ्नो गृह जिल्ला उदयपुरतिर लागेका हुन् ।
एकजना वरिष्ठ कूटनीतिज्ञले भने– यो उहाँको ठूलो भूल हो र वर्तमान सरकारको कूटनीतिक बेवास्ता पनि हो । यो भारतले आयोजना गर्ने फोरम हो र नेपालको विदेश सम्बन्धमा नेपाल भारतको संवेदनशिलता त सबैलाई थाहै छ । यस्तो बेलामा भारतका विदेशमन्त्रीले आमन्त्रण गरेको फोरममै जान अस्वीकार गर्नु नेपालको कूटनीतिक हितमा छैन ।
