पर्वत । नेकपा (एकीकृत समाजवादी) पार्टीका अध्यक्ष माधवकुमार नेपालले २०७४ सालको स्थानीय तहको निर्वाचनमा दलले प्राप्त गरेको मतका आधारमा गठबन्धन दलबीच सिट बाँडफाँट गरिने बताउनुभएको छ ।
पर्वतको कुश्मामा समाजवादी प्रेस सङ्गठनले आज आयोजना गरेको पत्रकार सम्मेलनमा अध्यक्ष नेपालले आसन्न स्थानीय तहको निर्वाचनमा गठबन्धन बनाएर जाने विषयमा कुनै दुविधा नभएको बताउनुभयो ।
उहाँले २०७४ सालको स्थानीय तह निर्वाचनले कुन दलको हैसियत कति छ भन्ने देखाएकाले गठबन्धनमा पनि सोहीअनुसार सहमति हुने बताउनुभयो । अहिले गठबन्धनमा पछि उम्मेदवार कसरी टुङ्ग्याउने भन्ने तरिकाका बारेमा छलफल भइरहेको उनले बताउनुभयो ।
उहाँले उम्मेदवार छनोट विधि तय गर्न सत्तारुढ गठबन्धनमा निरन्तर छलफल भइरहेको उल्लेख गर्दै स्थानीय तह, प्रदेश र प्रतिनिधिसभाको निर्वाचनसम्मै गठबन्धन कायम रहने जिकिर गर्नुभयो ।
आगामी निर्वाचनले एमालेबाट फुटेर बनेको एकीकृत समाजवादीको अवस्था के छ भन्ने पुष्टि हुने उहाँको भनाइ थियो ।
नेकपा (एमाले) त्यागेर आफ्नो नेतृत्वको पार्टीमा आउने क्रम तीव्र रहेको भन्दै अध्यक्ष नेपालले आगामी निर्वाचनले समाजवादीको अवस्थाबारे सबैलाई प्रस्ट पार्ने बताउनुभयो ।
