काठमाडौँ । सत्ता साझेदार दलहरूसँग चुनावी तालमेलको तयारी अघि बढेसँगै नेपाली कांग्रेसले उम्मेदवारको टुंगो तत्काल नलगाउन सर्कुलर गरेको छ ।
पार्टी केन्द्रीय समितिले यसअघि त्यस्ता उम्मेदवारको नाम सिफारिस गर्न र यथासक्य उम्मेदवारको टुंगो लगाउन सर्कुलर गरेको थियो । तर सत्तारुढ दलहरूसँग गठबन्धनको सम्भावना बढेसँगै पार्टीले उम्मेदवारको टुंगो तत्काल नलगाउन सर्कुलर गरेको हो ।
निर्वाचन आयोगले आगामी वैशाख ११ गते उम्मेदवारको मनोनयन गर्ने मिति निर्धारण गरेको छ । पार्टी विधानअनुसार नेपाली कांग्रेसले मनोनयन गर्नुभन्दा एक महिनाअघि नै उम्मेद्वारको टुङ्गो लगाइसक्नुपर्ने हो ।
वैशाख १ गतेसम्ममा उम्मेदवारको टुङ्गो लगाइसक्नुपर्ने भनी निर्देशन दिइएको भए पनि पुनः त्यो प्रक्रियालाई स्थगित गर्न पार्टीले निर्देश गरेको छ ।
पार्टीको विधानअनुसार प्रतिनिधिसभा क्षेत्रीय संसदीय समितिले वडाध्यक्ष र सदस्यहरु, जिल्ला संसदीय समितिले गाउँपालिका अध्यक्ष र उपाध्यक्षको उम्मेदवार तथा प्रदेश संसदीय समितिहरुले नगरपालिका प्रमुख र उपप्रमुखको उम्मेदवार टुङ्गो लगाउनुपर्नेछ ।
नेपाली कांग्रेसले सत्ता साझेदारका अन्य दलसँग आवश्यकताका आधारमा तालमेल गरेर चुनावामा भाग लिने तयारी गरेको छ । सत्ता साझेदार अन्य दलमा नेकपा (माओवादी केन्द्र), नेकपा (एकीकृत समाजवादी) जनता समाजवादी पार्टी (जसपा) र राष्ट्रिय जनमोर्चा रहेका छन् ।
