काठमाडौं । तीन दिने नेपाल भ्रमण सकाएर चिनियाँ विदेश मन्त्री वाङ यी स्वदेश फिर्ता हुनुभएको छ । आइतबार दिउँसो साढे २ बजेतिर उहाँ चीन प्रस्थान गर्नुभएको हो ।
उहाँलाई त्रिभुवन अन्तर्राष्ट्रिय विमानस्थलमा परराष्ट्र सचिव भरतराज पौड्यालले बिदाइ गर्नुभयो ।
विदेश मन्त्री यी गत शुक्रबार भारत हुँदै नेपाल आउनुभएको थियो ।
यीले नेपाल भ्रमणका क्रममा शनिबार शिवपुरीमा हाइकिङ गर्नुभएको थियो भने शनिबार भएको द्वीपक्षीय वार्तामा नेपाल र चीनबीच ९ बुँदे समझदारीमा हस्ताक्षर भएको थियो ।
यस्तै, विदेश मन्त्री यीले राष्ट्रपति विद्यादेवी भण्डारी, प्रधानमन्त्री शेरबहादुर देउवासँग शिष्टाचार भेट गर्नुभएको थियो ।
आइतबार स्वदेश फर्किनुअघि उहाँले प्रमुख प्रतिपक्षी दल नेकपा (एमाले)का अध्यक्ष एवं पूर्वप्रधानमन्त्री केपी शर्मा ओली र नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’सँग पनि भेट गर्नुभएको थियो ।
