काठमाण्डौं । नेपाली काँग्रेस निकट नेपाल विद्यार्थी संघ र नेपाल तरुण दलको अध्यक्ष मनोनयनप्रति शेखर कोइराला समूहले असन्तुष्टि जनाएको छ । पार्टी सभापति शेर बहादुर देउवाले एकलौटी रुपमा दुबै संस्थामा अध्यक्षहरु मनोनयन गरेको भन्दै शेखर समूहले यही चैत १४ गते भेला आयोजना गरेका छन् ।
नेविसंघका पूर्व अध्यक्ष रंजित कर्णले सभापति देउवाले एकलौटी र मनोमानी रुपमा नेविसंघ र तरुण दलका सभापति मनोनयन गरेकामा आपत्ति जनाउँदै त्यसको विरोधमा चैत १४ गते राजधानीमा भेला डाकिएको जानकारी दिनुभयो ।
भेलामा नेविसंघका पूर्व अध्यक्षहरु र देशैभरका प्रतिनिधिहरु समावेश हुने पनि कर्णले बताउनुभयो ।
तरुण दल र नेविसंघका सभापति चयन गर्दा आफूहरुलाई बेवास्ता गरिएको शेखर कोइराला समूहको भनाई छ ।
केही दिनअघि मात्र शेखर कोइरालाले पार्टी भित्र अब आफूहरु चुप लागेर नबस्ने र प्रतिबाद गरेर अघि बढ्ने बताउनु भएको थियो ।
