सभापतिमा उम्मेदवारी दिने तयारी गरिरहेको भनिएका नेपाली काँग्रेसका नेता प्रकाशमान सिंह काठमाडौँमै कमजोर देखिएका छन् । नेपाली काँग्रेसको आसन्न १४ औँ महाधिवेशनमा सिंहले सभापति पदमा उम्मेदवारी दिने तयारी गरिरहेको बताएका छन् ।
प्रकाशमानको आफ्नो आधार भनेको काठमाडौँ उपत्यका हो भनिएको छ । उनले आफूले काठमाडौँ उपत्यकाका अधिकांश प्रतिनिधिको मत प्राप्त गर्ने दाबी गरिरहेका छन् । तर पनि उपत्यका त परै जाओस् उनले काठमाडौँ जिल्लाकै मत मात्र पनि सुरक्षित गर्न सकिरहेका छैनन् ।
केन्द्रीय महाधिवेशनका लागि प्रतिनिधि छनोटका लागि सम्पन्न भएका सोमबार र मंगलबारका परिणामहरु हेर्दा यस्तो देखिएको हो । उनले कामठाडौँका निर्वाचन क्षेत्रहरुमध्ये एकपछि अर्काे गर्दै गुमाउँदै गएका छन् । यो परिणाम हेर्दा लाग्छ उनले आगामी महाधिवेशनमा देशका अरु जिल्ला त के काठमाडौँबाट नै मत पाउन गाह्रो छ ।
हिजो सम्पन्न काठमाडौँको क्षेत्र नं ५ को निर्वाचनमा उनले सभापति नै गुमाएका छन् । क्षेत्र नं ५ का निर्वाचित सभापति श्यामबहादुर खड्का संस्थापन पक्षका हुन् । यतिमात्र होइन, क्षेत्र नं ५ का अरु प्रतिनिधिहरु पनि देउवा पक्षका नै आएका छन् । सो क्षेत्रका एक महाधिवेशन प्रतिनिधिले भने– यहाँबाट निर्वाचित भएका २६ जनामध्ये २० जना प्रतिनिधि नै देउवाका छन् ।
यसअघि पनि प्रकाशमानले क्षेत्र नं ९ मा यस्तै परिणाम व्यहोर्नुपरेको थियो । उनले क्षेत्र नं ९को ख क्षेत्रमा त सभापतिको उम्मेदबार नै पाएका थिएनन् । सिंहले उम्मेदबार समेत नपाएपछि देउवा समर्थित राजेन्द्र प्रसाद भट्टराइको प्यानल नै निर्वाचित भएको थियो ।
त्यसैगरी सोही क्षेत्रको प्रदेश सभा क क्षेत्रमा पनि सभापतिमा देउवा समर्थित मोहन बस्नेत अध्यक्षमा आएका थिए । यी दुवै क्षेत्रबाट महाधिवेशन प्रतिनिधिहरु पनि देउवा समर्थित नै आएका थिए । यो परिणाम हेर्दा प्रकाशमान सिंहले आगामी महाधिवेशनमा सभापतिमा उम्मेदबारी दिने कि नदिने भन्ने विषयमा दुविधामा रहेका उनका एकजना समर्थकले जनाएका छन् ।
