काठमाडौं । पछिलो समय त्रिभुवन अन्तर्राष्ट्रिय विमानस्थलमा मर्मत सम्भारका कार्यहरु सुरु भएका छन् । विमानस्थल अस्तब्यस्त हुनुका साथै फोहोर बढेको गुनासो बढेपछि नेपाल नागरिक उड्डयन प्राधिकरण अन्तरगतको विमानस्थल कार्यालयले सुधारको काम तीव्र पारेको छ ।
झण्डै ९० लाख रुपैयाँ खर्चिएर अहिले विमानस्थलको प्रस्थानतर्फ धमाधम कार्पेटिङ भइरहेको छ । विमानस्थल कार्यालयका प्रमुख राजकुमार क्षेत्रीका अनुसार विमानस्थलको प्रस्थान कक्ष र अध्यागमन जेकजाँच कक्षमा कार्पेटिङ गर्ने काम अन्तिम चरणमा पुगेको छ ।
यस्तै विमानस्थलमा यात्रु र विमानस्थलको सुरक्षालाई ध्यानमा राख्दै नयाँ सुरक्षा जाँच केन्द्र स्थापना सँगै आन्तरिक उडानतर्फ अन्तर्राष्ट्रयस्तरको संरचना निर्माण गरेको छ ।विमानस्थलको आन्तरिक टर्मिनलको गेटबाट भित्रने स्थानमा सुरक्षा जाँच केन्द्रको स्थापना गरिएको छ ।
यहाँ पास रिर्डर, लगेज एक्स रे र वाक थ्रो एक्स रे बेबस्था गरिएको छ। अहिलेसम्म प्रहरीले हातले जाँच गर्दैमा अब विश्वसनीय प्रविधिको प्रयोग सुरु भएको छ ।
विमानस्थलका प्रमुख क्षेत्रीले विमानस्थलको पार्किङ व्यवस्थापनसहित भित्री भागहरु सजाउने काममा पनि लागेको बताए ।
विमानस्थलले अहिले आगमनतर्फ घडाहरु राखेको छ । ताउलोमा पपानी भरेर फूलहरु सजाएर राखिएको छ । यस्तै मौलिक तवरले विमानस्थललाई व्यवस्थापन गरेर सुधारका प्रयास भइरहेको दावी क्षेत्रीको छ ।
