काठमाडौं । म्यान्चेस्टर सिटीले इंग्लिस प्रिमियर लिग फुटबलमा हडर्सफिल्ड टाउनलाई पराजित गरेको छ ।
आइतबार राति सिटीले हडर्सफिल्डलाई उसैको घरेलु मैदानमा ३–० गोलअन्तरले पराजित गरेको हो । सिटीको जितमा डानिलो, रहिम स्ट्रलिङ र लोरी सानेले गोल गरे ।
सिटीका डानिलोले गोल गर्दै खेलको १८औं मिनेटमा १–० को अग्रता बनायो । पहिलो हाफमा एक गोलको अग्रता बनाएको सिटीले दोस्रो हाफमा थप दुई गोल गर्दा हडर्सफिल्डले भने कुनै गोल गर्न सकेन ।
५४ औं मिनेटमा स्ट्रलिङले गोल गर्दै सिटीको अग्रता दोब्बर बनाए । सिटीले दोब्बर अग्रता बनाएको दुई मिनेट पनि नवित्दै अर्को गोल थप्न सफल भयो । खेलको ५६ औं मिनेटमा उनको गोलमा सिटीले हडर्सफिल्डमाथि ३–० गोलको अग्रता बनाएको थियो । बाँकी समयमा दुवै टिमबाट गोल हुन नसकेपछि सिटीले हडर्सफिल्डमाथि सहज जित निकालेको हो ।
जितपछि लिगको दोस्रो स्थानमा रहेको सिटीको २३ खेलबाट ५६ अंक भएको छ । लिग लिडर लिभरपुलभन्दा अझै सिटी चार अंकले पछि छ । पराजित हडर्सफिल्डको भने ११ अंक मात्रै छ ।
टोटनहृयामको फुलहृयाममाथि संघर्षपूर्ण जित
आईतबार नै भएको अर्को खेलमा टोटनहृयामले फुलहृयाममाथि संघर्षपूर्ण जित निकालेको छ ।
टोटनहृयामले फुलहृयामलाई २–१ गोलअन्तरले पराजित गर्ने क्रममा डेली अली र विंक्सले गोल गरेका थिए । टोटनहृयामका लाउरेन्टले आत्मघाति गोल गरेपछि फुलहृयामले उपाहार स्वरुप एक गोल पाएको थियो ।
पहिलो हाफसम्म १–० गोलअन्तरले अघि रहेको फुलहृयामले दोस्रो हाफमा त्यो अग्रता जोगाउन सकेन । खेलको १७औं मिनेटमा नै टोटनहृयामका लाउरेन्टले आत्माघाति गोल गरेपछि फुलहृयामले अग्रता लिएको थियो ।
खेलको ५१औं मिनेटमा अलीले गोल गरेपछि टोटनहृयामले १–१ गोलको बराबरी बनाएको थियो । खेलको अतिरिक्त समयमा विंक्सले गोल गर्दै टोटेनहृयामलाई २–१ गोलको जित दिलाए ।
लिगको तेस्रो स्थानमा रहेको टोटनहृयामले जितपछि २३ खेलबाट ४९ अंक बनाएको छ । यता फुलहृयामको भने १५ अंक मात्रै रहेको छ ।
