काठमाडौं । राष्ट्रिय मानवअधिकार आयोगले अनसनरत डा. गोविन्द केसीको जीवनरक्षा गरिदिन सरकारलाई आग्रह गरेको छ ।
मंगलबार आयोगले विज्ञप्ति जारी गर्दै डा. केसीसँग सरकारले पटक पटक गरेको सम्झौताहरु लागु गरि उनको अनसन तोडाउन आग्रह गरेको हो । सरकार डा.केसीबिरुद्द गम्भीर नभएका कारण हरसम्भव प्रयास गरेर भएपनि सरकारले उनको माग पुरा गर्नुपर्ने आयोगको भनाई छ ।
आयोगले चिकित्सा शिक्षा जस्तो आधारभूत मानव अधिकारको विषयप्रति संवेदनशील भएर लाग्न सरकारसँग माग गरेको छ । आयोगका सचिव वेद भट्टराईद्वारा जारी विज्ञप्तिमा भनिएको छ ‘डा. केसीसँग नेपाल सरकारले विगतमा पटक–पटक गरेका सम्झौताहरुमा गम्भीर हुँदै उहाँको जीवन रक्षाका लागि हरसम्भव प्रयास गर्न आयोग नेपाल सरकारको ध्यानाकर्षण गराउँदछ ।’
आयोगले आपसी विमतिका विषयमा वार्ता र संवादको माध्यमबाट समस्याको समाधान गर्न पनि आग्रह गरेको छ । आयोगले महाराजगञ्जस्थित शिक्षण अस्पताल पुगेर केसीको स्वास्थ्य अवस्थाको जानकारी लिएको पनि उक्त बिज्ञप्तिमा जनाएको छ ।
