काठमाडौँ । नेपाली काँग्रेसको भ्रातृ संगठन नेपाल विद्यार्थी संघले शनिबार सरकारी गाडीमा अगजानी गरिएको विषयले ठुलो आलोचना खेपिरहेको बेला काँग्रेसका नेता तथा कार्यकता बाद-प्रतिबादमा उत्रिएका छन् ।
काँग्रेस नेता गगन थापाले नेविसंघले हिजो देशव्यापी रुपमा सरकारी गाडी सञ्चालनमा रोक तथा आगजनी गर्नुको साथै तोडफोड भएको बिषयमा सामाजिक संजालमा आफ्नो धारण राख्न नपाउदै नेविसंघका महामन्त्री कुन्दनराज काफ्लेले गगन थापा माथि टिप्पणी गर्न थालेका छन् ।
गगन थापाले आईतबार आफ्नो सामाजिक संजाल टुईटरमा नेविसंघले शनिबार गरेको गतिविधिको विरोध गर्दै लेखे ‘नेविसंघको नाममा केही ‘विद्यार्थी’ले सरकारी गाडी जलाएकोमा तपाईंको धारणा के हो, भनेर थुप्रै साथीहरूको प्रश्र रहेछ । किन्तु, परन्तु केही नलगाई मेरो उत्तर : त्यो कार्य गलत मात्र नभएर निन्दनीय छ । यस्तो कामलाई निरुत्सहित गर्न म डटेर लाग्नेछु ।’
यता नेविसंघका महामन्त्री कुन्दनराज काफ्लेले भने पार्टीका नेताहरुले वास्तविकता नबुझेर टिप्पणी गरेको बताएका छन् । उनले सरकारी गाडीको दुरुपयोग रोक्ने कार्यमा आफूहरुमाथि गाडी चालकले प्रतिवाद गर्न खोज्दा तोडफोड र आगजनी हुन पुगेको दाबी गरे ।
नेविसंघले शनिबार आफ्नो आह्वानलाई अवज्ञा गरेको भन्दै पोखरा, काठमाडौँ, बाँके र डोटीलगायतका क्षेत्रमा सरकारी गाडीमाथि तोडफोडका साथै आगजनी गरेको थियो । यस्तै विभिन्न ठाउँबाट करिब ७ सय सरकारी गाडीको चाबी नियन्त्रणमा लिएको थियो ।
सरकारी गाडीको चाबी नियन्त्रणमा लिनुका साथै आगजनी गरेको नेविसंघले यसअगाडि नै स्वीकार गरिसकेको छ ।
