महेन्द्रनगर । कञ्चनपुरको बेदकोटमा बिहिवारदेखि सुरु हुने बेदकोट धार्मिक तथा पर्यटन मेलाको उद्घाटन गर्न उपराष्ट्रपति नन्द बहादुर पुन महेन्द्रनगर पुगेका छन् ।
बेदकोट नगरपालिकाले गरेको मेलाको उद्घाटन गर्न उपराष्ट्रपति बुधवार बिहान महेन्द्रनगर पुगेका हुन् । उनलाई सुदूरपश्चिम प्रदेश सरकारका मुख्यमन्त्री त्रिलोचन भट्ट र प्रदेश प्रमुख मोहन बहादुर मल्लसहित प्रदेश सरकारका सभामुख र मन्त्रीहरु स्वागत गरेका थिए ।
पुन महेन्द्रनगरस्थित होटल ओपेरामा बस्ने छन् । बिहिवार हुने पर्यटन मेलाको उद्घाटन पछि शुक्लाफाँटा राष्ट्रिय निकुञ्ज र एसियाकै दोस्रो लामो झोलुङ्गे पुलको अवलोकन गर्ने कार्यक्रम रहेको आयोजक बेदकोट नगरपालिकाका नगर प्रमुख अशोक कुमार चन्दले जानकारी दिए ।
उपराष्ट्रपति महेन्द्रनगर पुगेपछि सुरक्षा व्यवस्था कडा पारिएको छ । राजमार्ग लगायत उपराष्ट्रपतिको सवारी हुने विभिन्न स्थानमा ठूलो संख्यामा सुरक्षाकर्मी परिचालन गरिएका छन् ।
