काठमाडौँ । प्रधानमन्त्री केपी शर्मा ओलीले नेपालीलाई सुहाउने गीत किन हटाएको भन्दै २५ हजार पुरस्कार घोषणा गरेको आरोप लगाएका छन् । प्रमुख विपक्षी कांग्रेसका सांसद अमरेशकुमार सिंहले संसदमै ‘लुट कान्छा लुट’का गायक पशुपति शर्मालाई २५ हजार पुरस्कार दिने घोषणा गरेपछि प्रम ओलीले उक्त आरोप लगाएका हुन् ।
बुधबार सुदूरपश्चिम प्रदेशसभालाई सम्बोधन गर्दै उनले सिंहप्रति कटाक्ष गरेका छन् । सिंहको नाम नलिइ उनले एक सांसदले नेपालीलाई सुहाउने गीत किन हटाएको भन्दै २५ हजार पुरस्कार घोषणा गरेको सुनाए । उनले हाँस्दै भने, ‘अचम्म लाग्यो मलाई, कहाँ जान खोज्दैछौं हामी ।’
शर्माले प्रधानमन्त्रीले जिम्मेवारी सम्हालेको १ बर्ष पुगेकै आसपास पारेर फागुन ३ गते ‘लुट कान्छा लुट’ बोलेको गीत सार्वजनिक गरेका थिए ।
गीतमा प्रधानमन्त्री केपि शर्मा ओलीप्रति पनि कडा व्यङ्ग्य गरिएको थियो । ठूला–ठूला भाषण गर्ने काम भने सिन्को समेत नभाच्ने, स्वर्ग जस्तो देशमा ‘यमराजको शासन’ चलेको जस्ता शब्द गीतमा प्रयोग गरिएपछि सरकारले उक्त गीतमाथि प्रतिबन्ध लगाउने खोजेको थियो ।
सरकारका काम कारवाहीका साथै राष्ट्रपति विद्यादेवी भण्डारीलाई समेत व्यङ्ग्य गरिएको छ ।
सत्तारुढ दल नेपाल कम्युनिष्ट पार्टी (नेकपा) भित्र यो गीतका विषयमा समेत छलफल गरेर गीतलाई रोक्ने निर्णय गरेको थियो। सत्तारुढ नेकपा सम्बद्ध युवा संघले पनि गीत नसच्याए बहिस्कार गर्ने धम्की दिएको थियो । लगतै शर्माले युट्युब च्यानलबाट आफ्नो गीत हटाएका छन् ।
