काठमाडौं । गृहमन्त्री गृहमन्त्री रामबहादुर थापा ‘बादल’ प्रदेश नम्बर ७ को नाम नै थाह भएन । गृहमन्त्री थापाले प्रदेशको नामाकरण भएको बारे अझै अनभिज्ञ रहेको पाइएको छ ।
एनसेलका टावरहरुमाथि भएको आक्रमणको सम्बन्धमा आइतबार राज्य व्यवस्था समितिको बैठकमा जानकारी दिने क्रममा गृहमन्त्री थापालाई यसबारे जानकारी नै नरहेको खुलासा भएको हो ।
गृहमन्त्री थापाले विभिन्न प्रदेशमा एनसेलका टावरमाथि भएको आक्रमणमा ‘प्रदेश नम्बर ७’ भन्दै तथ्यांक प्रस्तुत गरेका थिए ।
गृहमन्त्रीले तथ्यांक प्रस्तुत गरे लगत्तै, समितिका सांसदले ‘प्रदेश नम्बर ७ होइन, गृहमन्त्रीज्यू ! सुदुरपश्चिम प्रदेश हो’ भनेर सम्झाएका थिए ।
‘ए हो र ?’ आश्चर्यचकित हुँदै गृहमन्त्रीले भने, ‘सुदूरपश्चिम नाम भइसक्यो ?’
जवाफमा अरु सांसदहरुले ‘हो’ भन्दै गृहमन्त्री थापालाई जानकारी गराएका थिए ।
गृहमन्त्री थापाले त्यसपछि प्रदेश ७ को साटो सुदुरपश्चिम प्रदेश भनेर तथ्यांक पस्तुत गरेका थिए ।
प्रदेश नम्बर ७ को नामाकरण भएर ‘सुदूरपश्चिम’ बनेको महिनौँ भइसकेको छ ।
