काठमाडौँ । सुदुरपश्चिम प्रदेश बझाङकाबाट निर्वचित नेकपाका नेता सांसद अफिलाल शर्मा (ओखेडा) का छोरा बेपत्ता भएका छन् । ओखेडाका छोरा काठमाडौँको नयाँ बानेश्वरस्थित रत्नराज्य स्कुलबाट बेपत्ता भएका हुन् ।
परिवार स्रोतका अनुसार काठमाडौँको नयाँ बानेश्वरस्थित रत्नराज्य स्कुलमा कक्षा १० मा पढ्दै आएका १६ वर्षीय सागर सागर शर्मा (ओखेडा) फागुन १८ गते फोन स्वीच अफ गरेर सम्पर्क विहिन भएका थिए ।
महानगरीय प्रहरी परिसर काठमाडौंका प्रवक्ता (डिएसपी) होविन्द्र बोगटीले भने, ‘सिडीआर रिपोर्ट आएको छ, अपराध महाशाखा र काठमाडौँ परिसर दुवै ठाउँबाट खोजतलास गर्ने काम भईरहेको छ ।’
स्रोतका अनुसार परीक्षा नजिकै आएको अवस्थामा परिवारले राम्रोसँग परीक्षाको तयारी गर्न सुझाएपछि उनी सम्पर्क विहिन भएको बताइएको छ । सन्की स्वभावका सागरलाई सांसद ओखेडाले ‘स्कुल किन नगएको ?’ भन्दै हप्काएका थिए । बावुले हप्काएपछि सागरले फागुन १६ गते अमेरिकी दूतावासमा फोन गरेर ‘अमेरिका जान कत्ति पैसा लाग्छ’ भनेर सोधेका थिए ।
त्यसपछि फोन अफ गरेर हिँडेका सागर परिवारको सम्पर्कमा गएका छैनन् । प्रहरीले खोजी जारी राखेपनि उनी फेला पर्न नसकेको बताइएको छ । सागरले चलाउँदै आएको मोवाइल विगत १४ दिनदेखि बन्द छ ।
