काठमाडौँ । अख्तियार दुरुपयोग आयोगका पूर्वआयुक्त राजनारायण पाठकसँग अनुसन्धान अधिकृतले झन्डै ६ घण्टा बयान लिएका छन्। मंगलबार ७८ लाख घुस प्रकरणका तानिएका उनीसँग रकम लेनदेन र भिडियोका विषयमा बयान केन्द्रित गरिएको अख्तियार स्रोतले बतायो।
घुस प्रकरणका एक आरोपी नेपाल इन्जिनियरिङ कलेज चाँगुनारायण, भक्तपुरका तत्कालीन अध्यक्ष लम्बोदर न्यौपाने फरार भएपछि मुख्य आरोपी रहेका पाठकसँग बयान थालिएको हो। बयानमा उनले आफ्नो बचाउ गरेका छन्। पाठकलाई अख्तियारले अघोषित रूपमा ‘स्थानहद’ लगाएको छ।
उनलाई शान्तिनगरस्थित घरमै सादा पोसाकका प्रहरी खटाएर स्थानहद तोकिएको हो। ‘उहाँलाई आयोगमा बोलाएर बयान सुरु भएको छ। बयानमा करिब ६–७ घण्टा सवालजवाफ भएको थियो’, अख्तियार स्रोतले , ‘उहाँसँग लिखित रूपमा बन्द सवाल पनि गर्छौं।’
पाठकलाई त्रिभुवन अन्तर्राष्ट्रिय विमानस्थलमा पनि कडा निगरानी गरिएको छ। अघोषित स्थानहद लगाइए पनि उनले अख्तियार निगरानीमा काठमाडौंमा भने हिँडडुल गर्न पाउनेछन्। लम्बोदरको फरारका सम्बन्धमा आयोगले अहिलेसम्म प्रतिक्रिया दिएको छैन। उनी फरार भएपछि प्रमुख आयुक्त नवीनकुमार घिमिरेले अनुसन्धान टोली बोलाएर कडा निर्देशन दिएको अख्तियार स्रोतले बतायो।
पाठकलाई अकुत सम्पत्तिमा पनि मुद्दा चलाइने तयारी भइरहेकाले उनी तथा परिवारको सम्पत्ति विवरण खोज्ने काम पनि भइरहेको छ। अख्तियारका सहसचिवको नेतृत्वमा तीन सदस्यीय अनुसन्धान टोली पाठकको हरेक क्रियाकलापको निगरानी गर्दै अनुसन्धानमा तल्लीन छ। अख्तियार जतिसक्दो छिटो पाठकको मुद्दा सम्बन्धमा सार्वजनिक गर्ने तयारीमा छ।
