काठमाडौँ । विराटनगरमा सम्पन्न साफ महिला च्याम्पियनसिप फुटबलमा उपविजेता बनेको नेपाली महिला फुटबल टिम प्रशिक्षणमा फर्किएको छ । जापानमा २०२० मा हुने ओलम्पिक खेलकुदको महिला फुटबलको एसिया क्षेत्र छनोटको दोस्रो चरणको खेलको तयारीको लागि प्रशिक्षणमा फर्किएको हो ।
ललितपुरको सातदोबाटोस्थित एन्फा मैदानमा आज (बुधबार) देखि मुख्य प्रशिक्षक हरि खड्का प्रशिक्षणमा महिला टिमले अभ्यास थालेको हो ।
छनोटको दोस्रो चरणको खेल अप्रिल तीन तारिखदेखि म्यानमारमा हुँदैछ । समूह ‘ए’ मा रहेको नेपालसँगै आयोजक म्यानमार, इन्डोनेसिया र भारत रहेका छन् ।
नेपालले आफ्नो पहिलो खेल ३ अप्रिलमा आयोजक म्यानमारसँग खेल्नेछ । दोस्रो खेलमा नेपालले भारतसँग ६ अप्रिल प्रतिस्पर्धा गर्दैछ ।इन्डोनेसियासँग नेपालले ९ अप्रिलमा प्रतिस्पर्धा गर्नेछ ।
समूहको शीर्ष स्थानमा पर्ने टिम मात्रै अघिल्लो चरणमा प्रवेश गर्ने छ ।