पोखरा । रोजगारीको खोजीमा देशका युवा दिनानुदिन विदेशिएको वास्तविकतामा पोखरा महानगरपालिका–३३ भरतपोखरीमा व्यवसायिकतासँगै रोजगारी अभिवृद्धिको लक्ष्यका साथ युवा सक्रियतामा पानी कम्पनी सञ्चालनमा आएको छ ।
पछिल्ला समयमा तीव्र रुपमा बजारीकरण भइरहेको भरतपोखरीको चैनपुर फेदीमा झण्डै रु डेढकरोडको लागतमा हिल साइड ड्रिङकिङ वाटर प्रालि सञ्चालनमा ल्याइएको हो ।
कम्पनीका अध्यक्ष खगेन्द्रराज अधिकारीका अनुसार दैनिक १२ जनालाई प्रत्यक्ष रोजगारी दिन सकिने गरी सञ्चालनमा आएको उद्योगबाट दैनिक ५० हजार लिटर पानी बजारमा लगिने छ ।
उद्योगको उत्पादन ‘मिठो पानी’को आज यहाँ आयोजित शुभारम्भ कार्यक्रममा पोखरा महानगरपालिका–३३ का अध्यक्ष शिवप्रसाद आचार्यले भरतपोखरीमा विकासको क्रम तीव्र रुपमा बढिरहेका अवस्थामा औद्योगिकरणले पनि गति लिएको बताउनुभयो । सञ्चालक गोपिराज तिवारीका अनुसार गतवर्ष चैत १८ गतेबाट उद्योग सञ्चालनका लागि प्रक्रिया थालिएको जानकारी दिँदै एकवर्ष समयावधिमा उत्पादन बजारमा पुर्याउन सकिएको बताए ।
पानीलाई पोखरासहित देशका प्रमुख शहर हुँदै अन्तर्राष्ट्रिय बजारमा समेत पुर्याउने दीर्घकालीन लक्ष्य राखिएको छ । अर्का सञ्चालक सुदनराज अधिकारीले उद्योग सञ्चालनसँगै केही युवालाई प्रत्यक्ष तथा धेरैलाई अप्रत्यक्ष रोजगारी दिन सकिने धारणा राखे ।
