काठमाडौं । जारी सिजन खराब लयमा गुज्रिरहेको स्पेनिस महारथी रियल म्याड्रिडले अर्को बराबरीको नतिजा निकालेको छ । फरवार्ड करीम बेन्जेमाको गोलमा रियल हारबाट जोगिएको हो ।
स्पेनिस ला लिगा अन्तर्गत सोमबार राति भएको खेलमा रियल म्याड्रिड लेगानेससँग १–१ को बराबरीमा रोकिएको हो । खेलभर रियलले लेगानेसलाई दवावमा राखेपनि गोल गर्न निकै संघर्ष गर्नुपरेको थियो । पहिलो हाफको अन्तिम समयमा जोनाथन क्रिस्टियन सिल्भाले गोल गरेपछि रियल खेलमा पछि परेको थियो ।
तर, ५१औं मिनेटमा रियलका करिम बेन्जिमाले गोल गर्दै खेललाई १–१ गोलको बराबरीमा ल्याए । त्यसपछि पनि रियालले बल पोजसन राखेपनि गोल गर्न असमर्थ बन्यो ।
बराबरीसँगै रियालको ला लिगा उपाधियात्रा निकै कमजोर बनेको छ । ला लिगामा ६ चरणको खेल बाँकी रहँदा रियाल शीर्षस्थानको बार्सिलोनाभन्दा १३ अंकले तथा दोस्रो स्थानको शहरी प्रतिद्वन्द्वी एट्लेटिको म्याड्रिडभन्दा ४ अंकले पछि छ । लेगानेस ४१ अंक जोडेर ११औं स्थानमा छ ।
