काठमाडौं । धनकुटाको शहीदभुमि गाउँपालिकामा १४ वर्षीय छोराले आफ्नै बुवाको हत्या गरेका छन् । शहीदभुमि गाउँपालिका ४ पिप्लेका विज्ञान राईले कोदालोको पासोले हानेर ४७ वर्षीय बुवा ईन्द्रप्रसाद राईको हत्या गरेको जिल्ला प्रहरी कार्यालय धनकुटाले जनाएको छ ।
सामान्य विषयमा बुवाले विज्ञानलाई गाली गरेका थिए । बुवाले गाली गर्दा आवेशमा आएर छोरा विज्ञानले शनिवार राति करिब ८ बजे बुवालाई कोदालोको पासोले हानेर हत्या गरेको धनकुटा प्रहरी प्रमुख सुरेन्द्रबहादुर गुरुङले जानकारी दिए । उनका अनुसार कोदालो प्रहारबाट ईन्द्रप्रसादको घटनास्थलमै मृत्यु भएको हो ।
कोदालो प्रहार गर्ने विज्ञानलाई प्रहरीले नियन्त्रणमा लिएको छ । मृतकको शव पोस्टमार्टमका लागि जिल्ला अस्पताल ल्याइएको प्रहरीले जनाएको छ ।, आजको राजधानी दैनिकमा समाचार छ ।
