काठमाडौं । कांग्रेसकी राष्ट्रिय महासचिव प्रियंका गान्धी वाड्राले भारतीय प्रधानमन्त्री नरेन्द्र मोदीको जातबारे आफूलाई अहिलेसम्म थाहा नभएको बताएकी छिन् ।
अमेठीमा आइतबार पत्रकारसँगको कुराकानीमा प्रियंकाले विपक्षले यो मुद्दा कहिले पनि नउठाएको समेत बताइन् ।
उनले भनिन्, ‘अहिलेसम्म थाहा छैन कि प्रधानमन्त्रीको जात के हो । र मलाई लाग्छ कि विपक्षले कहिले पनि यस्तो प्रकारको उल्टो कुरा गरेका छैनन् । विपक्ष, जहाँसम्म मलाई थाहा छ, विशेषगरी जो कांग्रेसका नेता छन्, यो चुनावमा विकासको मुद्दा मात्र उठाइरहेका छन् । मात्र यस्ता मुद्दा, जुन जनतालाई सरोकार छ।।। कहिले व्यक्तिगत यस्तो आलोचना गरिनँ।।। ।’
प्रियंकाले भनिन्, ‘जनतालाई आदर गर्नु सबैभन्दा ठूलो राष्ट्रवाद हो । जनताको समस्या हल गर्नु राष्ट्रवाद हो । यद्यपी, यहाँ यस्ता मानिसहरु छन् जसले आवाज उठाउँदा त्यसलाई दबाइदिन्छन् । यो न त लोकतन्त्र हो न नै राष्ट्रवाद ।’
उनका अनुसार चुनावमा रोजगार, शिक्षा, बेरोजगारी, स्वास्थ्य नै उनको पार्टीको मुद्दा हो ।
शुक्रबार मोदीले आफ्नो जातबारे देश नै अनभिज्ञ भएको बताउँदै बिएसपीकी मायावती, समाजवादी पार्टीका अध्यक्ष अखिलेश यादव र कांग्रेसलाई यो मुद्दा उठाएकोमा धन्यवाद दिएका छन । ‘म तल्लो जातको हुँ । मेरो गाउँमा मेरो जातका केही मात्र घर छन् । म पिछडिएको जात मात्र होइन पिछडिएको समुदायसँग सम्बन्धित छु । मलाई बाध्य बनाएका कारण यस्तो भनिरहेको छु,’ मोदीले भने ।
यसअघि मायावतीले मोदी आफ्नो स्वार्थका लागि मात्र आफूलाई पिछडिएको जात बताइरहेको दाबी गरेकी थिइन् ।
