रक्सोल । अमलेखगन्ज पेट्रोलियम पाइपलाइन विच्छ्याउने काम अन्तिम चरणमा पुगेको छ । जंगलमा पर्ने रुख कटानसँगै पाइपलाइन विच्छ्याउने काम ४ किलोमिटर मात्र बाँकी रहेको अमलेखगन्ज–मोतिहारी पेट्रोलियम पाइपलाइन परियोजनाको जानकारी दिएको छ ।
नेपालतर्फ अमलेखगन्जदेखि रक्सोलसम्म ३६.२ किलोमिटर पाइप गाड्नुपर्नेमा अब जंगलक्षेत्रको करिब ४ किलोमिटरको काम मात्रै बाँकी रहेको हो । पाइपलाइन विच्छ्याउने काम सकिएसँगै इन्धन ल्याउने प्रक्रिया अगाडि बढ्ने छ । आगामी असारभित्रै पाइपलाइनबाट इन्धन ल्याउने नेपाल आयल निगमले भनाइ छ ।
भारततर्फको रक्सोलदेखि मोतिहारीसम्मको ३२.७ किलोमिटर पाइप गाड्ने काम भने यसअघि नै सम्पन्न भइसकेको छ । आयोजनाका अनुसार अहिले रुख कटान भएका क्षेत्रमा पनि धमाधम काम भइरहेको छ । रुख कटानको काम भइरहेको जंगल क्षेत्रमा ४ किलोमिटरबाहेक अन्य सबै ठाउँमा पाइप गाड्ने काम सम्पन्न भइसकेको समाचार आजको कारोबार दैनिकमा छ ।
