काठमाडौं । सगरमाथाको उचाइ मापन गर्न गएको सरकारी टोली स्वागत गरिएको छ । गएको चैत २७ गते सगरमाथाको उचाइ नाप्नका निम्ती प्रधानमन्त्री केपी शर्मा ओलीको शुभकामना लिएर गएको टोली बिहीबार काठमाडौं फर्किएको हो ।
काठमाडौं फर्किएको टोलीलाई भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले शुक्रबार स्वागत गरिन् ।
मन्त्री अर्यालले शुक्रबार मन्त्रालयमै पत्रकार सम्मेलनको आयोजना गरी नेपाल सरकारका तर्फबाट आफ्नै स्रोत सानधनमा सगरमाथाको उचाइ मापन गरेको भन्दै खुशि व्यक्त गरिन् ।
उनले मन्त्रालयका सचिव गोपिनाथ मैनाली, नापी विभागका महानिर्देशक प्रकाश जोशी लगायत सगरमाथाको आरोहण गरेर फर्किएको प्रमुख नापी अधिकृत उपसचिव खिमलाल गौतम नेतृत्वको टोलीलाई फूलमाला र टिकाले स्वागत गरिन् भने टोलीका सबै सदस्यहरूलाई मिठाइ खुवाएर खुशी बाँडेकी थिइन् ।
२०७२ सालको भूकम्पपछि सगरमाथाको उचाइमा घटबढ भएको हुनसक्ने विषयमा राष्ट्रिय तथा अन्तर्राष्ट्रिय स्तरमा कुरा उठेपछि त्यो विषयलाई मध्यनजर गर्दै नेपाल सरकार भूमि व्यवस्था, सहकारी तथा गरिबी निवारण मन्त्रालय, नापी विभागले आफ्नै स्रोतसाधनबाट सगरमाथाको उचाइ मापन कार्य अगाडि बढाएको हो ।
मन्त्री अर्यालले आरोहणको महत्वपूर्ण काम सम्पन्न गरेपनि ६ महिनाभित्र नेपाल आफैंले मापन गरेको सगरमाथाको वास्तविक उचाइ प्राप्त हुने बताइन् ।
