काठमाडौं । सिप्रदी यात्रीले नेपालमै इन्जिनियरिङ तथा उत्पादन गर्ने नयाँ विद्युतीय स्कुटर ‘यात्री ए२’ को मूल्य सार्वजनिक गरेको छ। कम्पनीले ए२ को सुरुवाती मूल्य ३ लाख २९ हजार ९०० रुपैयाँ तोकेको जनाएको छ।
नेपालको सडक तथा भौगोलिक अवस्थालाई ध्यानमा राखेर विकास गरिएको ए२ मा ग्राहकले आवश्यकता अनुसार ब्याट्री क्षमता, रङ, आराम तथा कनेक्टिभिटीका विभिन्न विकल्प छनोट गर्न सक्ने कम्पनीले जनाएको छ।
स्कुटरमा मिड–ड्राइभ मोटर प्रयोग गरिएको छ। कम्पनीका अनुसार यसले पाङ्ग्रामा ३१५ एनएम टर्क उत्पादन गर्छ। ए२ मा उच्च मजबुतीको स्टिल च्यासिस, लामो ट्राभल सस्पेन्सन, १४ इन्चका पाङ्ग्रा, डुअल डिस्क ब्रेक र कम्बाइन्ड ब्रेकिङ सिस्टम राखिएको छ।
कम्पनीले ए२ मा ३.०, ३.७ र ५.२ किलोवाट आवरका तीन ब्याट्री विकल्प उपलब्ध गराएको छ। ३.० किलोवाट आवरको ब्याट्रीले सहरी अवस्थामा ९० किलोमिटरसम्म, ३.७ किलोवाट आवरले ११२ किलोमिटरसम्म र ५.२ किलोवाट आवरले १५७ किलोमिटरसम्म रेन्ज दिने कम्पनीको दाबी छ। एक्स्टेन्डर प्याक प्रयोग गर्दा थप ५० किलोमिटरसम्म रेन्ज बढाउन सकिने जनाइएको छ। ब्याट्रीमा ८ वर्ष वा ८० हजार किलोमिटरसम्मको वारेन्टी उपलब्ध हुनेछ।
ए२ मा अनबोर्ड चार्जर राखिएको छ। ब्याट्रीको क्षमताअनुसार घरमै २.५ घण्टाभन्दा कम समयमा चार्ज गर्न सकिने तथा डीसी फास्ट चार्जिङमार्फत करिब ४१ मिनेटमा चार्ज गर्न सकिने कम्पनीले जनाएको छ।
स्कुटरमा ७ इन्चको डिस्प्ले, वायरलेस एप्पल कारप्ले तथा एन्ड्रोइड अटो, नेभिगेसन, मोबाइल एपमार्फत प्रत्यक्ष सवारी ट्र्याकिङ, चार्जिङ जानकारी, रुट योजना र सर्भिस अपोइन्टमेन्टलगायत सुविधा उपलब्ध छन्।
त्यस्तै, चाबीबिना स्कुटर सञ्चालन, हिल होल्ड, क्रुज कन्ट्रोल, विभिन्न राइडिङ मोड र मल्टिलेभल रिजेनेरेटिभ ब्रेकिङको सुविधा पनि दिइएको छ। सुरक्षाका लागि एन्टी थेफ्ट नोटिफिकेसन, मोटर लक तथा गति घटेको संकेत दिने टेललाइटलगायत सुविधा समावेश गरिएको कम्पनीले जनाएको छ।
सिप्रदी यात्रीले काठमाडौंको टेकुमा नयाँ एक्सपेरियन्स सेन्टर अक्टोबर २०२६ को पहिलो सातादेखि सञ्चालन गर्ने तयारी गरेको छ। उक्त सेन्टरमा ग्राहकले स्कुटर अवलोकन, टेस्ट राइड तथा बुकिङ गर्न सक्नेछन्।
नाडा अटो शोमा ए२ बुकिङ गरेका ग्राहकलाई डेलिभरी सुरु भएसँगै स्कुटर उपलब्ध गराइने कम्पनीले जनाएको छ। ३.७ र ५.२ किलोवाट आवरका भेरियन्टको डेलिभरी अक्टोबर मध्यदेखि नोभेम्बरसम्म सुरु हुने तथा अन्य भेरियन्टको डेलिभरी डिसेम्बर २०२६ देखि सुरु गर्ने तालिका कम्पनीले सार्वजनिक गरेको छ।
