काठमाडौं । रसुवा–भोटेकोसी–त्रिशूली क्षेत्रमा भएको विपद् तथा जलवायु परिवर्तनका विषयमा संसदीय विशेष समिति गठन गर्ने विषयमा प्रारम्भिक छलफल सुरु भएको छ ।
संसद्मा प्रतिनिधित्व गर्ने राजनीतिक दलका संसदीय दलका नेता, उपनेता तथा प्रमुख सचेतकहरूको सहभागितामा बिहीबार बिहानदेखि उक्त विषयमा छलफल भइरहेको हो ।
सत्तारूढ दल राष्ट्रिय स्वतन्त्र पार्टी (रास्वपा) का मुख्य सचेतक कविन्द्र बुर्लाकोटीका अनुसार शिक्षा समितिको हल, भवन नं. २ को भुँइतलामा बिहान ११ः३० बजेदेखि छलफल भइरहेको छ ।
बुर्लाकोटीले बुधबार सम्पन्न सर्वदलीय बैठकमा भएको छलफलअनुसार रसुवा–भोटेकोसी–त्रिशूली विपद् र जलवायु परिवर्तनको सन्दर्भमा संसदीय विशेष समिति गठन गर्ने विषयमा प्रारम्भिक छलफल थालिएको जानकारी दिए ।
उनले भने, ‘हिजो (बुधबार) सम्पन्न सर्वदलीय बैठकमा भएको छलफलअनुसार रसुवा–भोटेकोसी–त्रिशूली विपद् तथा जलवायु परिवर्तनको सन्दर्भमा संसदीय विशेष समिति गठन गर्ने विषयमा प्रारम्भिक छलफल गर्न संसद्मा रहेका दलहरूबाट संसदीय दलका नेता, उपनेता र प्रमुख सचेतकको सहभागितामा छलफल भइरहेको छ।’
छलफलमा विपद्को अवस्था, जलवायु परिवर्तनसँग यसको सम्बन्ध तथा यस विषयमा संसद्को भूमिकाका सम्बन्धमा विशेष समिति गठनको सम्भावनाबारे प्रारम्भिक धारणा आदानप्रदान भइरहेको छ।
