काठमाडौं । प्रमुख प्रतिपक्षी दल नेपाली कांग्रेसका सांसद अर्जुननरसिंह केसीले दैनिक उपभोग्य वस्तुमा भइरहेको अस्वाभाविक मूल्यवृद्धि नियन्त्रण गर्न सरकारको ध्यानाकर्षण गराउनुभएको छ ।
प्रतिनिधि सभाको बुधबारको बैठकमा बोल्दै सांसद केसीले मुलुकमा देखिएको संकटपूर्ण अवस्थालाई नाफा कमाउने अवसरका रूपमा प्रयोग गर्दै कालोबजारी मौलाएको आरोप लगाउनुभयो । उहाँले बजारमा खाद्यान्न तथा दैनिक उपभोग्य वस्तुको मूल्य अस्वाभाविक रूपमा बढ्दा सर्वसाधारण मारमा परेको बताउनुभयो ।
सांसद केसीका अनुसार पछिल्लो समय चामलको मूल्य प्रतिबोरा २ हजार ७ सय रुपैयाँ, सूर्यमुखी तेलको मूल्य प्रतिलिटर ३ सय रुपैयाँ, तोरीको तेल ४ सय ४० रुपैयाँ र खसीको मासुको मूल्य प्रतिकिलो १ हजार ७ सय रुपैयाँसम्म पुगेको छ । त्यस्तै, अण्डाको मूल्य प्रतिगोटा २५ रुपैयाँ पुगेको तथा सागपात र फलफूलसमेत सर्वसाधारणको पहुँचबाहिर गएको उहाँले बताउनुभयो ।
उहाँले पछिल्लो चार महिनामा मूल्यवृद्धि ४ दशमलव ५६ प्रतिशत पुगेको उल्लेख गर्दै बजार अनुगमन तथा आपूर्ति व्यवस्थापनमा सरकार गम्भीर हुन नसकेको आरोप लगाउनुभयो ।
ग्यासको आपूर्तिमा समेत समस्या देखिएको भन्दै सांसद केसीले काठमाडौं उपत्यकामा दैनिक करिब ४० हजार सिलिण्डर ग्यासको माग रहे पनि त्यसको आधाभन्दा कम मात्र आपूर्ति भइरहेको दाबी गर्नुभयो । ग्यासका लागि सर्वसाधारणले घण्टौँ लाइन बस्नुपर्ने अवस्था रहेको तर कालोबजारमा प्रतिसिलिण्डर २ हजार ६ सय रुपैयाँसम्ममा सहजै ग्यास पाउने अवस्था रहेको उहाँको भनाइ थियो ।
उहाँले संकटको आडमा सिर्जना गरिएको यस्तो अस्वाभाविक बजार चक्रले राज्यको उपस्थितिमाथि नै प्रश्न उठाएको बताउनुभयो । बजारमा भइरहेको मूल्यवृद्धि नियन्त्रण गरी सर्वसाधारणलाई सहज रूपमा दैनिक उपभोग्य वस्तु उपलब्ध गराउन सरकार गम्भीरतापूर्वक लाग्नुपर्ने उहाँले बताउनुभयो ।
