काठमाडौँ । राष्ट्रिय प्रजातन्त्र पार्टी (राप्रपा)का प्रवक्ता मोहनकुमार श्रेष्ठले बागमती प्रदेशकी उपसभामुखले संसदीय भूमिकाको संवैधानिक निष्पक्षता गुमाएको आरोप लगाएका छन् ।
श्रेष्ठले सामाजिक सञ्जालमार्फत हेटौँडामा मंगलबार बसेको प्रदेशसभा बैठकलाई लिएर उपसभामुखको भूमिकामाथि प्रश्न उठाएका हुन् । उनले पदका लोभी सांसदहरूको अभिष्ट पूरा गर्न प्रतिपक्षीविहीन संसद सञ्चालन गरिएको आरोप लगाएका छन् ।
उनले उपसभामुखले ‘संसदीय मान्यता, गरिमा र मर्यादालाई तिलाञ्जली दिएको’ टिप्पणी गर्दै संसदीय प्रजातन्त्रमा गलत नजिर स्थापित भएको दाबी गरेका छन् ।
श्रेष्ठले केही ‘आफ्ना भनिएका’ व्यक्तिसमेत सत्ता राजनीतिको फोहोरी खेलमा संलग्न भएको आरोप लगाउँदै उपसभामुख ‘गुण्डुराजको रबर स्ट्याम्प’ बनेको आरोपसमेत लगाएका छन् ।
उनले राजनीतिक, नैतिक तथा संवैधानिक अराजकतामाथि सम्मानित अदालतले लगाम लगाउने विश्वास व्यक्त गरेका छन् ।
