काठमाडौँ। नेपाली काँग्रेसका नेता नारायणप्रकाश साउदले संविधानको रक्षा गर्नुको अर्थ यसमा कुनैपनि सुधार नगर्नु नभएको बताउनुभएको छ ।
शनिवार काठमाडौंमा आयोजित काँग्रेसको संस्थापन इतर पक्षको राष्ट्रिय भेलालाई सम्बोधन गर्दै उनले संविधान एक जीवित राजनैतिक दस्तावेज भएकाले अनुभवका आधारमा यसलाई परिमार्जन गर्न सकिने बताउनुभएको हो ।
नेता साउदले संविधानको कार्यान्वयनका क्रममा देखिएका व्यावहारिक कठिनाइ, संस्थागत कमजोरी र राजनैतिक अनुभवका आधारमा आवश्यक सुधार गर्नुपर्नेमा जोड दिनुभयो ।
तर यस्तो सुधार वा संशोधन सत्ता समीकरण परिवर्तन गर्ने हतियार वा कुनै दलको तत्कालीन राजनैतिक स्वार्थ पूरा गर्ने माध्यम बन्न नहुने उहाँको तर्क छ ।
उहाँले नेपाली काँग्रेसले संविधानको रक्षा गर्दै आवश्यक सुधारको नीति लिनुपर्ने बताउनु भयो । संविधानको मूल लोकतान्त्रिक चरित्र, संघीयता, गणतन्त्र, समावेशिता र मौलिक अधिकारलाई कमजोर नपारी समयअनुकूल परिमार्जन गर्ने बाटो अपनाउनुपर्ने उनको भनाइ छ । लोकतान्त्रिक प्रणालीको प्रभावकारिताका बारेमा चर्चा गर्दै नेता साउदले केवल संविधान र संस्थाको रक्षा गरेर मात्र लोकतन्त्र सफल नहुने उल्लेख गर्नुभयो ।
उहाँले भन्नुभयो, ‘संविधानको रक्षा गर्नु भनेको संविधानमा कुनै सुधार गर्न नहुने भन्ने होइन । संविधान जीवित राजनीतिक दस्तावेज भएकाले यसको कार्यान्वयनका क्रममा देखिएका व्यावहारिक कठिनाइ, संस्थागत कमजोरी र राजनीतिक अनुभवका आधारमा आवश्यक सुधार गर्न सकिन्छ । तर संविधान संशोधन सत्ता समीकरण परिवर्तन गर्ने हतियार वा कुनै दलको तत्कालीन राजनीतिक स्वार्थ पूरा गर्ने माध्यम बन्नु हुँदैन । संविधान संशोधनका विषयमा व्यापक राजनीतिक संवाद, नागरिक समाज र विज्ञहरूको सहभागिता तथा प्रदेश र स्थानीय तहका दृष्टिकोणलाई समेट्दै समावेशिता, संघीयताको प्रभावकारिता र लोकतान्त्रिक मूल्यलाई केन्द्रमा राख्नुपर्छ । कांग्रेसले संविधानको मूल लोकतान्त्रिक चरित्र, संघीयता, गणतन्त्र, समावेशिता र मौलिक अधिकारलाई कमजोर नगरी समयानुकूल सुधारको नीति लिनुपर्छ । लोकतन्त्रको रक्षा संविधान र संस्थाको संरक्षणमा मात्र सिमित हुँदैन; लोकतन्त्रले नागरिकलाई परिणाम पनि दिन सक्नुपर्छ । रोजगारी, सुरक्षा, न्याय, सेवा, अवसर र सम्मानको अनुभूति दिलाउन नसके लोकतान्त्रिक संस्थाप्रतिको नागरिक विश्वास कमजोर हुनसक्छ । त्यसैले काँग्रेसले लोकतन्त्र, सुशासन, सामाजिक न्याय र नागरिक स्वतन्त्रतालाई एकीकृत राजनीतिक अवधारणाका रूपमा अघि बढाउनुपर्छ ।’
उहाँले अबको दिनमा काँग्रेसले लोकतन्त्र, सुशासन, सामाजिक न्याय र नागरिक स्वतन्त्रतालाई एकीकृत राजनैतिक अवधारणाका रूपमा अगाडि बढाउनुपर्ने बताउनु भयो ।– न्युज एजेन्सी नेपाल
