काठमाडौं । नेपाली कांग्रेसका सभापति गगन थापाले प्रधानमन्त्री वालेन्द्र शाह (बालेन) नेतृत्वको सरकार शासकीय अराजकतामा फसेको आरोप लगाएका छन् ।
आइतबार कांग्रेस केन्द्रीय कार्यसमिति बैठकलाई सम्बोधन गर्दै सभापति थापाले सरकार आफ्नो उद्देश्य र बाटोबाट बरालिएको दाबी गरे । सरकारका गलत काममाथि कांग्रेसले निगरानी राख्दै आवश्यक हस्तक्षेप गर्ने उनको भनाइ छ ।
थापाले प्रधानमन्त्री शाहले आफूलाई ‘ब्रेक नभएको गाडी’का रूपमा प्रस्तुत गरेको प्रसंग उल्लेख गर्दै सरकारलाई गति बढाउने छुट भए पनि संविधान, विधि र शासनको ‘लेन’ मिच्ने छुट नभएको बताए ।
‘प्रधानमन्त्रीले मेरो गाडीमा ब्रेक छैन भन्नुभएको छ । उहाँले स्पीडमा हिँड्ने निर्णय गर्नुभएको छ भने त्यसमा हाम्रो भन्नु केही छैन । स्पीड बढाउन सक्नुहुन्छ, ब्रेक नलगाउन सक्नुहुन्छ, तर लेन मिच्न दिँदैनौँ,’ थापाले भने ।
उनले सरकार गलत दिशातर्फ अघि बढे त्यसलाई सही बाटोमा ल्याउने जिम्मेवारी प्रमुख प्रतिपक्षीका रूपमा कांग्रेसको रहेको बताए । सरकारको कामकारबाहीमाथि खबरदारी गर्दै आवश्यक ठाउँमा कांग्रेसले लगाम लगाउने उनको भनाइ थियो ।
प्रतिनिधिसभा निर्वाचनपछि प्रमुख प्रतिपक्षी दलको भूमिकामा कांग्रेस संविधान र लोकतान्त्रिक प्रक्रियाअनुसार सही बाटोमा अघि बढिरहेको दाबीसमेत थापाले गरे ।
