काठमाडौं ।नेपाली कांग्रेसका महामन्त्री गुरुराज घिमिरेले पार्टीको आधिकारिकतासम्बन्धी विषय सर्वोच्च अदालतमा पुनरावलोकनको चरणमा प्रवेश गरे पनि संगठन सुदृढीकरण र रूपान्तरणको अभियान कुनै पनि अवस्थामा नरोकिने बताएका छन्।
शुक्रबार सामाजिक सञ्जालमार्फत आफ्नो धारणा सार्वजनिक गर्दै घिमिरेले विधिको शासन र स्वतन्त्र न्यायपालिकाप्रति नेपाली कांग्रेसको विश्वास व्यवहारमै प्रतिबिम्बित हुने उल्लेख गरेका छन्। उनले अदालतको प्रत्येक कानुनी प्रक्रियाको सम्मान गर्ने स्पष्ट गर्दै कानुनी प्रक्रियाले आफ्नो बाटो लिने तर पार्टीको संगठन निर्माण, आन्तरिक लोकतन्त्र, सुशासन र जनविश्वास पुनर्स्थापनाको अभियान अझ तीव्र रूपमा अघि बढ्ने बताएका छन्।
घिमिरेले नेपाली कांग्रेसको वर्तमान दिशा अधिकांश महाधिवेशन प्रतिनिधिको विश्वास, विशेष महाधिवेशनको वैधानिक जनादेश र पार्टी रूपान्तरणको साझा संकल्पबाट निर्धारित भएको दाबी गरेका छन्।
उनले लोकतन्त्रको सार असहमतिलाई स्वीकार गर्नु भए पनि त्यसलाई अन्तहीन विवादमा रूपान्तरण गर्नु उचित नहुने बताएका छन्। संवाद, संस्थागत प्रक्रिया र पार्टी विधान नै लोकतान्त्रिक दलका सबैभन्दा विश्वसनीय आधार भएको उनको भनाइ छ।
महामन्त्री घिमिरेले संस्थाका निर्णय आफूअनुकूल हुँदा मात्र स्वीकार्ने र प्रतिकूल हुँदा अस्वीकार गर्ने प्रवृत्तिले संस्थाभन्दा व्यक्तिकेन्द्रित राजनीतिलाई प्रोत्साहन गर्ने टिप्पणी गरेका छन्।
उनले अहिले नेपाली कांग्रेसलाई विभाजनको बहसभन्दा एकताको संकल्प, अविश्वासको राजनीतिभन्दा रूपान्तरणको नेतृत्व आवश्यक रहेको उल्लेख गर्दै सम्पूर्ण नेता, कार्यकर्ता तथा शुभेच्छुकलाई व्यक्तिगत आग्रहभन्दा माथि उठेर संगठन, सिद्धान्त र साझा भविष्यको पक्षमा दृढतापूर्वक उभिन आग्रह गरेका छन्।
