काठमाडौं । मलेसियामा नेपाली श्रमिक पठाउन निश्चित वैदेशिक रोजगार व्यवसायी (म्यानपावर) लाई फाइदा पुग्ने गरी सिन्डिकेट गर्न चलखेल भएको भन्ने समाचारप्रति श्रम, रोजगार तथा सामाजिक सुरक्षा मन्त्रालयले आपत्ति जनाएको छ।
विगत केही दिनयता विभिन्न सञ्चारमाध्यम तथा सामाजिक सञ्जालमा मन्त्रालयलाई समेत जोडेर त्यस्ता समाचार तथा सामग्री प्रकाशित भएको भन्दै मन्त्रालयले आफ्नो गम्भीर ध्यानाकर्षण भएको जनाएको हो।
मन्त्रालयले वैदेशिक रोजगारलाई स्वच्छ, प्रतिस्पर्धी, पारदर्शी र श्रमिकमैत्री बनाउने विषयमा आफूहरू सदैव प्रतिबद्ध रहेको स्पष्ट पारेको छ। प्रतिस्पर्धालाई सीमित गर्ने तथा सीमित व्यवसायीको एकाधिकार कायम हुने कुनै पनि गतिविधि हुन नदिन मन्त्रालय सचेत र क्रियाशील रहेको जनाएको छ।
मन्त्रालयका अनुसार विद्यमान नीतिगत, कानुनी तथा प्रक्रियागत पक्षमा सुधार गर्दै सूचना प्रविधिको अधिकतम उपयोगमार्फत सेवा प्रवाहलाई थप प्रभावकारी बनाउने काम भइरहेको छ।
यस्तो अवस्थामा मन्त्रालयका कामलाई ओझेलमा पार्ने र विषयान्तर गर्ने उद्देश्यले अफवाह तथा भ्रम फैलाउने कार्य गलत र तथ्यमा आधारित नभएको मन्त्रालयको दाबी छ। मन्त्रालयले सम्बन्धित सबैलाई यस्ता भ्रम र अन्योलमा नपर्न आग्रह गरेको छ।
मलेसियासँग सम्बन्धित विषयमा सम्बन्धित देशबाट समेत हालसम्म कुनै आधिकारिक जानकारी प्राप्त नभएको मन्त्रालयले जनाएको छ। साथै, वैदेशिक रोजगार व्यवसायलाई प्रतिस्पर्धी, पारदर्शी र व्यावसायिक बनाउन गन्तव्य मुलुकसँग कूटनीतिक पहलमार्फत वैदेशिक रोजगारलाई स्वच्छ, नैतिक तथा प्रतिस्पर्धी बनाउने प्रयास भइरहेको मन्त्रालयको भनाइ छ।
यस कार्यमा सम्बद्ध सबै पक्षको सहयोग र सहकार्यका लागि मन्त्रालयले अपेक्षा गरेको छ।
