काठमाडौं । झण्डै दुई अर्ब रुपैयाँ बराबरको अवैध हुण्डी कारोबारमा संलग्न रहेको आरोपमा प्रहरीले एक जनालाई पक्राउ गरेको छ।
नेपाल प्रहरीको केन्द्रीय अनुसन्धान ब्युरो (सीआईबी) ले धादिङको सत्यदेवी गाउँपालिका–८ स्थायी घर भई हाल काठमाडौं महानगरपालिका होइन, नागार्जुन नगरपालिका–८ मा बस्दै आएका ४९ वर्षीय राजेन्द्रप्रसाद रिजाललाई पक्राउ गरेको हो।
सीआईबीका प्रवक्ता प्रहरी वरिष्ठ उपरीक्षक (एसएसपी) अनुपम शमशेर जबराका अनुसार शंकास्पद बैंकिङ कारोबारको विश्लेषण गर्ने क्रममा रिजालले अन्य व्यक्तिसँगको मिलेमतोमा हुण्डीमार्फत एक अर्ब ८९ करोड ६५ लाख ३९ हजार ४५४ रुपैयाँ बराबरको अवैध कारोबार गरेको प्रारम्भिक अनुसन्धानबाट खुलेको छ।
अनुसन्धानका लागि आवश्यक कानुनी प्रक्रिया पूरा गर्दै सीआईबीले मंगलबार जिल्ला अदालत काठमाडौंबाट पक्राउ अनुमति लिएको थियो। त्यसपछि सोही दिन बेलुका नागार्जुन नगरपालिका–८ स्थित राधाकृष्ण मन्दिर आसपासको क्षेत्रबाट रिजाललाई नियन्त्रणमा लिइएको प्रहरीले जनाएको छ।
घटनाबारे थप अनुसन्धान भइरहेको सीआईबीले जनाएको छ।
