काठमाडाैँ । प्रतिपक्ष दल नेकपा (एमाले) ले संसदीय गतिविधिलाई थप व्यवस्थित, तार्किक र प्रभावकारी बनाउन विज्ञहरूको ज्ञान र सुझावलाई संस्थागत ढंगले उपयोग गर्ने नीति अघि सारेको छ ।
नेकपा (एमाले) संसदीय दलकी उपनेता पद्मा अर्यालले पार्टी केन्द्रिय कार्यालय च्यासलमा आयोजित एक कार्यक्रममा यससम्बन्धी कार्ययोजनाबारे जानकारी दिनुभएको हो । उपनेता अर्यालले संसद्मा पार्टीको प्रश्तुतिलाई केवल राजनीतिक मात्र नभई प्राज्ञिक, बौद्धिक र तथ्यपरक बनाउनुपर्नेमा जोड दिनुभयो ।
उहाँले राजनीतिक अनुभवले खारिएको नेतृत्व र विभिन्न विधामा विज्ञता हासिल गरेका व्यक्तित्वहरूको ‘फ्युजन’ बाट पार्टीलाई सही मार्गनिर्देशन प्राप्त हुने विश्वास व्यक्त गर्नुभयो । पार्टीले विज्ञहरूको रुचि र दक्षताका क्षेत्रहरू पहिचान गर्न फारम उपलब्ध गराउने र सोही आधारमा विज्ञहरूको ‘रोस्टर’ तयार गर्ने प्रक्रिया शुरु गरेको छ ।
अर्यालकाअनुसार विज्ञहरूलाई उनीहरूको विशिष्टताका आधारमा विभिन्न ‘क्लस्टर’ मा विभाजन गरिनेछ । संसद्मा सांसदहरूले राख्ने धारणालाई थप ओजनदार र तथ्यपरक बनाउन एउटा ‘इस्यु कलेक्सन सेन्टर’ (मुद्दा संकलन केन्द्र) समेत स्थापना गरिने जानकारी उहाँले दिनुभयो । उक्त केन्द्रले जनस्तरका समस्या, सामाजिक मुद्दा तथा राष्ट्रिय र अन्तर्राष्ट्रिय घटनाक्रमको सुक्ष्म अध्ययन गरी तथ्यहरू संकलन गर्नेछ, जसले सांसदहरूलाई सदनमा प्रभावकारी बहस गर्न मद्दत पु¥याउनेछ ।
उपनेता अर्यालले जनताको आवाज सरकारसम्म पु¥याउन र सरकारका गलत कदमको खबरदारी गर्दै सही मार्गमा ल्याउन एमालेको भुमिका प्रखर हुनुपर्ने बताउनु भयो । उहाँले पार्टीको दृष्टिकोणलाई राष्ट्रिय र अन्तर्राष्ट्रिय स्तरमा स्थापित गर्न विज्ञहरूको सुझाव अपरिहार्य रहेको उल्लेख गर्नुभयो ।
