बादी समुदायका ८४ विद्यार्थीलाई एक वर्षको भर्ना शुल्क सहयोग

सुर्खेत। सामुदायिक विकास केन्द्र नेपाल (सिडिसी) ले बादी समुदायका ८४ जना अनाथ तथा विपन्न विद्यार्थीलाई एक वर्षको विद्यालय भर्ना शुल्क सहयोग गरेको छ।

CDC नेपालले शिक्षा, पोषण तथा सामाजिक संरक्षणलाई प्राथमिकतामा राख्दै सञ्चालन गरेको ‘A Campaign of Hope – Education, Nutrition & Care’ कार्यक्रमअन्तर्गत उक्त सहयोग प्रदान गरिएको हो। वीरेन्द्रनगर–८ स्थित बादी सरोकार मञ्च नेपालमा आयोजित कार्यक्रममा विद्यार्थीहरूलाई शैक्षिक सहयोग हस्तान्तरण गरिएको थियो।

आर्थिक अभावका कारण शिक्षाबाट वञ्चित हुने जोखिममा रहेका बालबालिकालाई विद्यालयमा निरन्तर अध्ययन गर्ने वातावरण सिर्जना गर्ने उद्देश्यले कार्यक्रम सञ्चालन गरिएको आयोजकले जनाएको छ।

कार्यक्रमलाई सम्बोधन गर्दै सिडिसी नेपालकी अध्यक्ष राधा मातंगीले शिक्षा सामाजिक परिवर्तनको सबैभन्दा प्रभावकारी माध्यम भएको बताउनुभयो। आर्थिक अवस्था कमजोर भएका बालबालिकालाई विद्यालयमा टिकाइराख्न यस्ता कार्यक्रम आवश्यक रहेको बताउनुभयाे ।

‘हरेक बालबालिकाले गुणस्तरीय शिक्षा पाउने अधिकार राख्छ। आर्थिक अभाव कुनै पनि बालबालिकाको भविष्यमा बाधा बन्नु हुँदैन,’ उहाँले भन्नुभयो, ‘सिडिसी नेपालले आगामी दिनमा पनि शिक्षा, पोषण, स्वास्थ्य र सामाजिक न्यायका क्षेत्रमा यस्ता अभियानलाई निरन्तरता दिनेछ।’

उहाँले सरकारी निकाय, निजी क्षेत्र तथा राष्ट्रिय–अन्तर्राष्ट्रिय दातृ संस्थासँग सहकार्य गर्दै थप बालबालिका तथा विपन्न समुदायसम्म पुग्ने प्रतिबद्धता व्यक्त गर्नुभयो।

यसैगरी, सिडिसी नेपालका कोषाध्यक्ष रेशम नेपालीले संस्थाले प्राप्त गर्ने सहयोगलाई पारदर्शी, उत्तरदायी र प्रभावकारी रूपमा लक्षित समुदायसम्म पुर्‍याउने प्रतिबद्धता व्यक्त गर्नुभयो।

अभियानलाई सफल बनाउन श्याम–फुलमाया फाउन्डेसनले मुख्य आर्थिक सहयोग गरेको हो। विशेषगरी श्याम सार्की मगरातीको सहयोगले ८४ जना बालबालिकाको शैक्षिक यात्रा सहज बनाउन महत्वपूर्ण योगदान पुगेको कार्यक्रममा उल्लेख गरिएको थियो।

कार्यक्रममा फुलमाया सार्की मगराती तथा श्याम–फुलमाया हस्तकला उद्योगको सामाजिक योगदानको समेत प्रशंसा गरिएको थियो। शिक्षा क्षेत्रमा गरिएको लगानीले दीर्घकालीन सामाजिक परिवर्तनमा महत्वपूर्ण भूमिका खेल्ने विश्वास व्यक्त गरिएको छ।

सिडिसी नेपालका अनुसार अभियानको उद्देश्य बालबालिकालाई विद्यालयमा टिकाइराख्नु, शिक्षामा पहुँच बढाउनु तथा उनीहरूको समग्र विकासमा योगदान पुर्‍याउनु हो।

कार्यक्रममा बादी सरोकार मञ्च नेपाल, वीरेन्द्रनगर नगरपालिका, विद्यालय परिवार, अभिभावक, स्थानीय समाजसेवी तथा विभिन्न संघसंस्थाका प्रतिनिधिको सहभागिता थियो।

सिडिसी नेपालले शिक्षा, स्वास्थ्य, पोषण, महिला तथा बाल अधिकार, जीविकोपार्जन र सीमान्तकृत समुदायको सशक्तीकरणका क्षेत्रमा यस्ता कार्यक्रमलाई आगामी दिनमा थप विस्तार गर्ने जनाएको छ।