काठमाडाैँ । नेपाली कम्युनिष्ट पार्टीका सांसद महेन्द्रबहादुर शाहीले सरकार सस्तो लोकप्रियता र प्रचारमुखी गतिविधिमा मात्र केन्द्रित हुँदा मुलुक विकासको सट्टा बर्बादीको दिशामा गइरहेको टिप्पणी गर्नुभएको छ ।
प्रतिनिधि सभाको बुधवारको बैठकमा बोल्दै सांसद शाहीले नेपाल–भारत सीमा सम्बन्धमा प्रधानमन्त्रीले दिएको विवादित अभिव्यक्तिका बारेमा सरकारले संसद्मा स्पष्ट धारणा सार्वजनिक गर्नुपर्ने माग गर्नुभएको हो । राष्ट्रिय हित र सार्वभौमिकतासँग जोडिएको गम्भीर विषयमा सरकार मौन बस्नु सान्दर्भिक नहुने तर्क गर्दै उहाँले सरकारको आधिकारिक धारणा नआएसम्म प्रतिपक्षको विरोध जारी रहने जानकारी दिनुभयो ।
सांसद शाहीले नेपाली जनताको मुख्य चाहना भौतिक पूर्वाधार विकास, आर्थिक समृद्धि, सुशासन र सामाजिक न्याय रहेको उल्लेख गर्दै वर्तमान सरकार ती मुद्दाहरूबाट विचलित भएको आरोप लगाउनु भयो । विगतका राजनीतिक दलहरूले केही गरेनन् भन्ने प्रचारबाजी गर्न सजिलो भएपनि वर्तमानले के ग¥यो भन्ने प्रश्नको जवाफ दिन कठिन रहेको उहाँले बताउनु भयो । इतिहास प्रचारबाट नभई कामबाट बन्ने जिकिर गर्दै उहाँले विगतका राजनीतिक दलहरूको योगदान इतिहासले नै मूल्यांकन गर्ने स्पष्ट पार्नुभयो ।
सांसद शाहीले राज्यका संस्थाहरूलाई कमजोर पारेर व्यक्ति बलियो बन्ने प्रवृत्तिले लोकतन्त्रलाई खतरामा पार्ने चेतावनी दिनुभयो । सरकारले प्रतिपक्षको आलोचनालाई शत्रुताको रूपमा नलिई आफ्ना काममार्फत जवाफ दिनुपर्नेमा उहाँको जोड छ । सरकारका वर्तमान गतिविधिहरू अपरिपक्व र फितलो भएको टिप्पणी गर्दै उहाँले यसले जनतामा आशा होइन, अविश्वास मात्र पैदा गरिरहेको बताउनु भयो । सांसद शाहीले चरम संस्थागत भ्रष्टाचारका घटनाहरूको निष्पक्ष छानबिन गरी दोषीमाथि कारबाही गर्न र राज्यको दोहन गरिएको सम्पत्ति ढुकुटीमा फिर्ता ल्याउन माग गर्नुभयो ।
युवाहरूका लागि स्वदेशमै रोजगारी सिर्जना, उत्पादन वृद्धि र सुकुम्बासी लगायतका सामाजिक समस्याहरूको समाधानका लागि सरकार जिम्मेवार हुनुपर्ने उहाँको भनाइ थियो । मुलुकको विकास र समृद्धिको साझा एजेण्डामा सत्तापक्ष र प्रतिपक्ष सबै एक ठाउँमा उभिनुपर्नेमा उनले जोड दिनुभयो ।
उहाँले प्रतिपक्षका आरोपको प्रतिरोधमा उत्रिनुभन्दा सुशासन र सेवा प्रवाह सुधारमा सरकार केन्द्रित हुनुपर्नेमा जोड दिनुभयो ।
