काठमाडौँ। भारतको राजधानी नयाँ दिल्लीमा बिहीवार रातिदेखि परेको भारी वर्षाका कारण जनजीवन अस्तव्यस्त बनेको छ ।
वर्षासँगै आएको बाढी र डुबानका कारण दिल्लीका विभिन्न क्षेत्रमा व्यापक अवरोध सिर्जना भएको छ । भारतीय मौसम विज्ञान विभागले भारी वर्षा, मेघगर्जन र चट्याङको सम्भावना औंल्याउँदै रेड अलर्ट जारी गरेको छ ।
अत्यधिक वर्षाका कारण दिल्लीका मुख्य सडकहरू जलमग्न भएका छन् । सडकमा घुँडासम्म पानी जमेपछि पैदल यात्रीहरूलाई आवतजावतमा कठिनाइ भएको छ भने सवारी साधनहरूको गति सुस्त बनेको छ ।
विभिन्न स्थानमा रुख ढलेर सडक अवरुद्ध हुँदा लामो ट्राफिक जाम देखिएको छ । यसैबीच, दिल्लीको रोहिणी क्षेत्रमा निर्माण कार्य जारी रहेको एक चारतले भवन भत्किँदा तीन जनाको मृत्यु भएको छ ।
दुर्घटनापछि तत्कालै उद्धार तथा खोजी कार्य शुरु गरिएको थियो । स्थानीय अधिकारीहरूले भवन भत्किनुको कारणबारे अनुसन्धान शुरु गरिसकेका छन् । सिन्ह्वा/ न्युज एजेन्सी नेपाल
