काठमाडौँ। मिटरब्याज विरुद्धको किसान मजदुर आन्दोलनले जनकपुरधामको तिरहुतिया गाछीबाट तेस्रो ‘पैदल न्याय मार्च’ शुरु गरेको छ ।
साहु–महाजनको शोषण र फर्जी लिखतका विरुद्ध न्याय खोज्दै पीडितहरूले काठमाडौंसम्मको पैदल यात्रा तय गरेका हुन् ।
न्याय मार्चको उद्घाटन गर्दै मिटरब्याज विरुद्ध किसान मजदुर आन्दोलनका केन्द्रिय अध्यक्ष अवधेश कुशवाहले साहु–महाजनहरूले नक्कली कागजातको सहारा लिई अदालती प्रक्रियामार्फत किसानलाई भूमिहीन बनाइरहेको आरोप लगाउनु भयो ।
अध्यक्ष कुशवाहले फर्जी तमसुकमार्फत किसानको जग्गा हडप्ने र उनीहरूलाई आफ्नै भूमिबाट बेदखल गर्ने प्रक्रिया तिब्र पारिएको भन्दै आक्रोश व्यक्त गर्नुभयो ।
कार्यक्रममा बोल्दै अभियन्ता निर्ग नवीनले सरकारले मिटरब्याज पीडितका समस्या समाधान गर्ने वाचा गरे पनि अहिले त्यसबाट पछाडि हटेको आरोप लगाउनु भयो ।
उहाँले वर्तमान सरकारले पीडितका समस्या समाधानमा कुनै चासो नदेखाएकाले जनकपुरधामबाट पुनः पैदल यात्रा सुरु गरिएको जानकारी दिनुभयो । यसपटकको न्याय मार्च काठमाडौं पुगेर सिंहदरबार घेराउ गर्ने र सरकारलाई आफ्ना पीडा सुनाउने लक्ष्य रहेको नवीनले बताउनु भयो ।
न्याय मार्च शुरु गर्नुअघि पीडितहरूले मशाल जुलुस प्रदर्शन गरेका थिए । साथै, उनीहरूले प्रतीकात्मक रूपमा फर्जी तमसुकहरू जलाएर आन्दोलनको घोषणा गरेका थिए ।
पीडितहरूले साहु–महाजनको शोषणबाट मुक्ति र फर्जी तमसुक खारेजीको मागलाई मुख्य एजेन्डा बनाएका छन् । –न्युज एजेन्सी नेपाल
