काठमाडौं । नेकपा एमालेका महासचिव शंकर पाेखरेलले निर्वाचनका बेला मितव्ययिता र सुशासनको चर्को नारा दिएर जनताको मत प्राप्त गरेका राजनीतिक शक्तिहरू सत्तामा पुगेपछि आफ्नै प्रतिबद्धताविपरीत गतिविधिमा लागेको आरोप लगाएका छन्।
सामाजिक सञ्जालमार्फत धारणा सार्वजनिक गर्दै उनले राज्यकोषको दोहन रोक्ने तथा राज्यका निकायलाई राजनीतिक प्रभावबाट मुक्त बनाउने वाचा गर्नेहरू नै अहिले विभिन्न मन्त्रालयमा सल्लाहकार र निजी सहयोगीहरूको ठूलो संख्या नियुक्त गर्दै समानान्तर शक्तिकेन्द्र खडा गर्न व्यस्त रहेको बताएका छन्।
पोखरेलले परिवर्तन र सुशासनको आशामा राष्ट्रिय स्वतन्त्र पार्टीलाई विश्वास गरेर मतदान गरेका मतदाताले अहिलेको अवस्थालाई कसरी लिएका होलान् भन्ने प्रश्न उठाएका छन्। उनले यस्तो व्यवहारलाई आम जनताको भरोसामाथिको ठूलो मजाकको रूपमा चित्रण गरेका छन्।
उनले सरकारलाई निर्वाचनका समयमा गरेका प्रतिबद्धताप्रति फर्किन आग्रह गर्दै स्वेच्छाचारी शैलीका गतिविधिले जनतालाई निराश बनाउने बताएका छन्। जनताको विश्वास जोगाउन सरकार आफ्ना वाचा र प्रतिबद्धताअनुसार अघि बढ्नुपर्ने उनको भनाइ छ।
