काठमाडाैँ । स्याङ्जाकाे वालिङ नगरपालिका–६ एक्लेपिपलस्थित मिर्दि–चापाकोट भित्री सडकखण्डमा अटो दुर्घटना हुँदा पाँच जना घाइते भएका छन्।
आज अन्दाजी १४:३० बजे गण्डकी प्रदेश ०४–००१ ह ०५७४ नम्बरको अटो अनियन्त्रित भई सडकबाट करिब ३० मिटर तल खसेको प्रहरीले जनाएको छ। दुर्घटनापछि घाइतेहरूलाई उपचारका लागि प्राथमिक स्वास्थ्य केन्द्र वालिङ लगिएको थियो।
घटनास्थलमा वडा प्रहरी कार्यालय वालिङबाट प्रहरी टोली खटिएको थियो। दुर्घटनाग्रस्त अटोलाई नियन्त्रणमा लिई वडा प्रहरी कार्यालय वालिङमा राखिएको छ भने चालकलाई नियन्त्रणमा लिई थप अनुसन्धान भइरहेको प्रहरीले जनाएको छ।
घाइतेमध्ये स्याङ्जा, वालिङ–६ साठ्ठीघरेकी २१ वर्षीया सलिना नेपालीको टाउको र अनुहारमा गम्भीर चोट लागेकाले उनलाई थप उपचारका लागि पोखरा रिफर गरिएको छ। सोही स्थानका १८ महिनाका दिप्सन नेपालीलाई पनि थप उपचारका लागि आफन्तको साथमा १५:२० बजे पोखरा रिफर गरिएको छ।
त्यस्तै, सोही स्थानकी २६ वर्षीया सुमित्रा नेपालीको ढाड, टाउको र दुवै खुट्टामा चोट लागेको छ भने ५० वर्षीय दुर्गा बहादुर गौतमको दायाँ हात, टाउको र छातीमा चोट लागेको छ। उनीहरू दुवैको अवस्था मध्यम रहेको प्रहरीले जनाएको छ।
अटो चालक वालिङ–८ बस्ने २६ वर्षीय सुमन बस्यालको बाँया हात र खुट्टामा सामान्य चोट लागेको छ । दुर्घटनाको कारणबारे थप अनुसन्धान भइरहेको प्रहरीले जनाएको छ।
