काठमाडौँ । राष्ट्रिय प्रजातन्त्र पार्टी (राप्रपा) ले पश्चिम नवलपरासीको सुस्ता क्षेत्रमा भारतीय सशस्त्र सीमा बल (एसएसबी) का जवानहरू नेपाली भूमिमा प्रवेश गरेको विषयमा सरकारको स्पष्ट धारणा सार्वजनिक गर्न माग गरेको छ।
सोमबार प्रतिनिधि सभाको बैठकमा विशेष समय लिएर बोल्दै राप्रपा सांसद भरत गिरीले उक्त घटनाबारे सरकारसँग औपचारिक जवाफ माग गर्नुभएको हो।
सांसद गिरीका अनुसार जुन १३ मा पश्चिम नवलपरासीको सुस्ता गाउँपालिका–५ थारु टोल क्षेत्रमा हतियारसहितका भारतीय एसएसबी जवानहरू बिना अनुमति नेपाली भूमिमा प्रवेश गरेका थिए। स्थानीय किसानले प्रतिरोध गर्दै उनीहरूलाई फर्काएको उहाँले बताउनुभयो।
उहाँले राज्यको कमजोर उपस्थिति कारण सीमावर्ती क्षेत्रमा बसोबास गर्ने नागरिकहरू आफैं सुरक्षा गर्न बाध्य भएको टिप्पणी गर्नुभयो। “सरकारको उपस्थिति होस् वा नहोस्, देश जोगाउन देखाइएको स्थानीयको साहस सम्पूर्ण नेपालीका लागि प्रेरणादायी छ,” उहाँले भन्नुभयो।
सांसद गिरीले पूर्वको पशुपतिनगरदेखि पश्चिमको महाकालीसम्म फैलिएको नेपाल–भारत खुला सीमामा बसोबास गर्ने लाखौं नागरिकको सुरक्षा र राज्यको दृष्टिकोणबारे प्रश्न उठाउनुभयो। साथै, सुस्ता घटनालाई मात्र नभई कालापानी, लिपुलेक र लिम्पियाधुरा लगायतका सीमा विवादसँग जोडेर हेर्नुपर्ने उहाँको भनाइ थियो।
उहाँले सीमामा यस्ता घटना दोहोरिन नदिन संवेदनशील क्षेत्रमा सुरक्षा व्यवस्था सुदृढ गर्न, सीमा विषयलाई राष्ट्रिय प्राथमिकतामा राख्न तथा आगामी नेपाल–भारत परराष्ट्रस्तरीय बैठकहरूमा स्पष्ट रूपमा उठाउन सरकारसँग माग गर्नुभयो।
सांसद गिरीले प्रधानमन्त्रीको पछिल्लो अभिव्यक्तिले सीमामा खटिरहेका स्थानीयको योगदानको अपमान भएको जस्तो देखिएको भन्दै सरकारको आधिकारिक धारणा स्पष्ट हुनुपर्ने पनि बताउनुभयो।
सुस्ताका स्थानीय किसानले राष्ट्रिय स्वाभिमान र भूगोलको रक्षा गर्न देखाएको साहस प्रशंसनीय रहेको उल्लेख गर्दै उहाँले उनीहरूको योगदानको सम्मान हुने गरी राज्यले ठोस कदम चाल्नुपर्नेमा जोड दिनुभयो।
