काठमाडाैँ । नेपाली काँग्रेसका सचेतक निश्कल राईले मुलुकका विभिन्न कृषि क्षेत्रमा देखिएका समस्या तथा विकास आयोजनाका कारण उत्पन्न जटिलताप्रति सरकारको ध्यानाकर्षण गराउनुभएको छ।
प्रतिनिधि सभाको शुक्रबारको बैठकमा बोल्दै उहाँले विशेषगरी चिया, दुध र सुपारी किसानले भोगिरहेका समस्याहरू तत्काल समाधान गर्न सरकारसँग माग गर्नुभयो।
सचेतक राईले पूर्वी नेपालमा वि.सं. २०४१/४२ सालदेखि सुरु भएको व्यावसायिक चिया खेती अहिले संकटमा परेको उल्लेख गर्नुभयो। चिया क्षेत्रका अग्रजहरूको योगदान स्मरण गर्दै उहाँले उद्योगीहरूले समस्या समाधान नभए आगामी असार १ गतेदेखि उद्योग बन्द गरी सरकारलाई साँचो बुझाउने तयारी गरिरहेको जानकारी दिनुभयो।
छिमेकी मुलुकमा नेपाली चिया निर्यातमा देखिएको अवरोध हटाउन ‘जी–टु–जी’ (सरकार–सरकार) माध्यमबाट पहल गर्न र तेस्रो मुलुकमा बजार विस्तारका लागि सरकारले विशेष ध्यान दिनुपर्ने उहाँको आग्रह थियो।
त्यसैगरी, दुग्ध किसानले विगत छ महिनादेखि दूधको भुक्तानी नपाएको विषय पनि उहाँले सदनमा उठाउनुभयो। उहाँले भन्नुभयो, “दुग्ध किसानले मूल्य नपाउँदा परिवारको जीविकोपार्जन र बालबालिकाको शिक्षामा गम्भीर असर परेको छ।”
उहाँले सुपारी खेतीलाई कृषि उपजको मान्यता नदिइएको र किसानले उत्पादन गरेको सुपारी ओसारपसारमा समेत समस्या भइरहेको बताउनुभयो। १ केजी सुपारी बोकेर हिँड्दा समेत समस्या भोग्नुपरेको भन्दै उहाँले सुपारीलाई कृषि उपजको मान्यता दिन र सहज वातावरण बनाउन सरकारसँग माग गर्नुभयो।
मेची राजमार्ग विस्तारको सन्दर्भमा बोल्दै सचेतक राईले १५ मिटर फराकिलो बनाउने कार्य अघि आवश्यकताको पहिचान (निड एसेसमेन्ट) गर्नुपर्नेमा जोड दिनुभयो। सवारी चाप घट्दै गएको र वैकल्पिक मार्गहरू उपलब्ध रहेको अवस्थामा वर्षायाममा नागरिकलाई अनावश्यक समस्या हुने गरी राजमार्ग विस्तार गर्न नहुने उहाँको तर्क थियो।
उहाँले किसानका आधारभूत समस्या तथा पूर्वाधार विकासका नाममा देखिएका अन्योलप्रति सरकारलाई जिम्मेवार बन्न आग्रह गर्नुभयो।
