काठमाडाैँ । राष्ट्रिय स्वतन्त्र पार्टी (रास्वपा) का सांसद भरत पराजुलीले सरकारले आगामी १० वर्षमा ३० हजार मेगावाट विद्युत् उत्पादन गर्ने लक्ष्य हासिल गर्न नीतिगत, कानुनी र प्रशासनिक अवरोधहरू हटाउन पहल भइरहेको बताएका छन्।
उनका अनुसार उक्त लक्ष्य केवल विद्युत् उत्पादनमा सीमित नभई देशको दीर्घकालीन आर्थिक भविष्यसँग जोडिएको विषय हो। उनले सरकार यो लक्ष्य पूरा गर्न आवश्यक सुधारका कामहरू अघि बढाइरहेको बताए।
पराजुलीले धेरै जलविद्युत् तथा ऊर्जा आयोजनाहरू जग्गा प्राप्ति र मुआब्जा प्रक्रियाका कारण प्रभावित भइरहेको उल्लेख गरे। उनले वातावरण संरक्षण आवश्यक भए पनि वन क्षेत्रको प्रयोग अनुमति र रुख कटान स्वीकृति प्राप्त गर्न वर्षौं लाग्ने अवस्थाले लगानीमैत्री वातावरण बन्न नसकेको धारणा राखे।
त्यसैगरी उनले प्रसारण लाइन निर्माणमा हुने ढिलाइका कारण उत्पादन सम्पन्न भइसकेका आयोजनाहरू पूर्ण क्षमतामा सञ्चालन हुन नसकेको बताए। उनले यस क्षेत्रमा पनि सरकार सक्रिय रूपमा सुधारका काम गरिरहेको उल्लेख गरे।
सांसद पराजुलीले वर्षायाममा उत्पादन हुने विद्युत् आन्तरिक खपत र निर्यात बजारको अभावलाई पनि प्रमुख चुनौतीको रूपमा औँल्याएका छन्।
