काठमाडौं । नेपाल चेम्बर अफ कमर्सका अध्यक्ष कमलेश अग्रवालले सरकारले ऊर्जा क्षेत्रका लागि ल्याएको नीति तथा कार्यक्रम तथा बजेट स्वागतयोग्य रहेको बताएका छन्।
स्वतन्त्र ऊर्जा उत्पादकहरूको संस्था नेपाल (इप्पान) को २४औँ साधारण सभा तथा ८औँ अधिवेशनमा शुभकामना मन्तव्य दिँदै अध्यक्ष अग्रवालले ऊर्जा क्षेत्रको विकास र विस्तारलाई प्राथमिकता दिँदै ल्याइएका सरकारी कार्यक्रम सकारात्मक रहेको बताए।
उनले विद्युत् व्यापार र प्रसारण लाइनमा निजी क्षेत्रको सहभागिता बढाउने सरकारी नीति महत्वपूर्ण कदम भएको उल्लेख गर्दै ऊर्जा क्षेत्रमा देखिएका विभिन्न समस्याको समाधानतर्फ बजेट केन्द्रित भएकाले यसको स्वागत गर्नुपर्ने बताए।
अग्रवालले नेपाल लामो समयदेखि “नीति र नियति” बीचको अन्तरका कारण अपेक्षित उपलब्धि हासिल गर्न नसकेको धारणा राखे। नीति राम्रो बने पनि कार्यान्वयन पक्ष कमजोर हुँदा अपेक्षाअनुसार परिणाम प्राप्त हुन नसकेको उनको भनाइ थियो।
“नेपाल नीति र नियतिको दलदलमा फसेको छ। नीति सधैं राम्रो आउँछ, तर नियति राम्रो हुँदैन। त्यसैले राम्रो नीति बने पनि कार्यान्वयन नहुँदा अपेक्षाकृत काम हुन सकेको छैन,” उनले भने।
उनले नेपाल जलस्रोतको दृष्टिले अत्यन्तै धनी देश रहेको उल्लेख गर्दै देशको पानी नै ‘सुनको खानी’ भएको बताए। जलस्रोतको उचित उपयोग गर्न सके ऊर्जा क्षेत्रले देशको आर्थिक विकासमा ठूलो योगदान पुर्याउन सक्ने उनको भनाइ थियो।
