काठमाडाैँ । प्रतिपक्ष दल नेकपा (एमाले)ले सरकारले प्रस्तुत गरेको आगामी आर्थिक वर्षको बजेटले गरिब तथा निमुखा वर्गलाई सम्बोधन गर्न नसकेको टिप्पणी गरेको छ।
बिहीबार प्रतिनिधिसभाको बैठकमा बजेटमाथिको सामान्य छलफलमा सहभागी हुँदै एमाले संसदीय दलकी उपनेता पद्मा अर्यालले बजेटले गरिबी न्यूनीकरणतर्फ ठोस र प्रभावकारी कार्यक्रम नल्याएको आरोप लगाउनुभयो।
उहाँले बजेटमा निमुखा वर्गलाई माथि उकास्ने, उनीहरूको जीविकोपार्जन सुधार गर्ने र जीवनस्तर उकास्ने स्पष्ट योजना नदेखिएको बताउँदै सरकारले प्रस्तुत गरेको बजेटले धनी र गरिबबीचको खाडल झन् बढाउने जोखिम रहेको टिप्पणी गर्नुभयो।
उहाँले भन्नुभयो, “बजेटले गरिबीलाई सम्बोधन गर्न सकेको छैन। बजेट वक्तव्यमा गरिबी शब्दको पर्याप्त सम्बोधन देखिँदैन। सरकार मध्यम वर्गको विकासको कुरा गर्छ, तर त्यसको आधार कमजोर वर्गको उत्थानबिना सम्भव हुँदैन।”
अर्यालले २० प्रतिशत निरपेक्ष गरिबीको रेखामुनि रहेका नागरिकलाई माथि नउठाई मध्यम वर्ग विस्तार सम्भव नहुने भन्दै सरकारले आधारभूत आय वृद्धि, सीप विकास र बजार पहुँचजस्ता विषयमा ध्यान दिनुपर्ने आवश्यकता औंल्याउनुभयो।
उहाँका अनुसार, बजेटले निमुखा वर्गका लागि स्थायी रूपमा रोजगारी, सीप र आम्दानी वृद्धि गर्ने स्पष्ट कार्यक्रम नल्याएकाले यसले वर्गीय असमानता झन् बढाउने खतरा देखिएको छ।
