काठमाडौं । नेकपा एमालेका महासचिव शंकर पाेखरेलले ‘जान्नेलाई छान्ने’ भन्ने नाराको वास्तविकता एकपछि अर्को गर्दै उजागर भइरहेको टिप्पणी गरेका छन्।
सामाजिक सञ्जालमार्फत आफ्नो धारणा सार्वजनिक गर्दै उनले देशविरुद्धका गतिविधिलाई सामान्यीकरण गर्ने, राज्यविरुद्धका विध्वंसात्मक अपराधलाई बहादुरीका रूपमा प्रस्तुत गर्ने, स्वार्थमा आधारित ‘सेटिङ’लाई विधिको रूप दिने तथा अर्थ विधेयकजस्तो संवेदनशील दस्तावेजमा गैरकानुनी छेडखानी गर्ने प्रवृत्ति बढ्दै गएको आरोप लगाए।
पोखरेलले अवैध धनका स्रोतलाई प्रणालीको कमजोरीका रूपमा व्याख्या गर्ने, आफ्ना पक्षका व्यक्तिलाई विभिन्न उपाय अपनाएर उन्मुक्ति दिने र अरूलाई जसरी पनि दोषी देखाउन खोज्ने कार्यलाई ‘जान्नेलाई छान्ने’ को उदाहरणका रूपमा प्रस्तुत गर्न खोजिएको भए त्यो योग्यता नभई पाखण्ड भएको उल्लेख गरेका छन्।
उनले यस्ता गतिविधिले स्वेच्छाचारिता, पक्षपात र भ्रष्टाचारलाई संस्थागत बनाउने दाबी गरेका छन्।
पोखरेलले सुशासन र तीव्र विकासका लागि विगतका कमजोरी तथा विकृतिहरू हटाउन आवश्यक रहेको बताए। तर, नयाँपनको नाममा विगतका गलत अभ्यासलाई ओझेलमा पार्ने वा बिर्साउने प्रयास कुनै पनि हालतमा उचित हुन नसक्ने उनको भनाइ छ।
