काठमाडौं । तिहारलगत्तै राजधानी काठमाडौंलगायत तराईका विभिन्न स्थानमा छठको चहलपहल सुरु भएको छ । विशेषगरी तराईका जिल्लामा मनाइने छठ बुधबारबाट विधिवत् सुरु भएको हो । मिथिलाञ्चलभर विभिन्न तालतलाउ, पोखरी, इनार तथा प्रसिद्ध नदीछेउ छठ मनाउने प्रचलन छ । छठ मनाउन राजधानीको कलपोखरी गौरीघाट, कुपण्डोललगायतका पोखरी तथा खोला किनारमा सरसफाइ र सौन्दर्यीकरण तीव्र बनाइएको छ ।
कमलपोखरी छठ पूजा समाजले पूजा गर्नेको नामावली संकलन भइरहेको जनाएको छ । समाजका उपाध्यक्ष अनन्त दाहालले यस वर्ष घाट अथवा पूजा गर्न छुट्याइएको ठाउ“ घट्न सक्ने बताए । ‘गत वर्ष २८८ घाट थिए, यस वर्ष कमलपोखरीमा भइरहेको पुनर्निर्माणका कारण कमले मात्र पूजा गर्न पाउनेछन्,’ उनले भने ।
केही वर्षदेखि खोला तथा पोखरीमा छठ मनाउने परम्परा सुरु भएसँगै राजधानीमा बसोबास गर्ने तराईवासी र भारत मूलका नागरिकले आफू बसेको ठाउ“वरपरका खोला किनार छठ मनाउन थालेका छन् । जनकपुरका अजित सिंह पहिलोपटक कमलपोखरीमा छठ मनाउन लागेको बताउँछन् । ‘धेरै वर्ष गाउ“मा मनाइयो तर यसपटक समयका कारण काठमाडौंमै छठ मनाउने तयारीमा छु,’ उनी भन्छन्, ‘खर्च र समयका कारण पनि आफू रहेकै स्थानमा मनाउने थालेको पाइन्छ ।’
यसरी मनाइन्छ छठ छठको पहिलो दिन आरोग्य, अहिंसा, सत्य र समृद्धिका रूपमा नुहाएर शुद्ध खानेकुरा खाने गरिन्छ । पूजाको दोस्रो दिन व्रतालुले दिनभर उपवास बसेर राति खीर, पुरीलगायत गृह र सूर्य देवतालाई चढाई बिनानुनको खानेकुरा खाने चलन छ । पर्व तेस्रो दिन व्रतालु विभिन्न पकवान तथा फलफुलसहित माटाका भाँडामा राखेर साँझपख नदी तलाउमा अस्ताउँदो सूर्यलाई अर्घ दिने गर्दछन् ।
त्यसदिन रातभर नदी, तलाउ तथा पोखरी डिलमा जाग्राम बस्ने गरिन्छ । त्यसको भोलिपल्ट बिहान उदाउँदो सूर्यलाई अर्घ दिँदै छठ पर्व समापन गर्ने गरिन्छ । शुद्ध मनले छठ पूजा आराधना गरे निःसन्तानले सन्तान पाउने र रोगीले स्वास्थ्य लाभलगाायतका फल प्राप्त हुने विश्वास रहँदै आएको छ । राजधानी दैनिकबाट
