काठमाडौँ । नेकपा एमालेका अध्यक्ष केपी शर्मा ओलीले वर्तमान सरकार पूर्वाग्रहपूर्ण ढंगले अघि बढिरहेको आरोप लगाएका छन् ।
बुधबार राजधानीमा आयोजित एक कार्यक्रममा बोल्दै उनले सरकारले नयाँ पार्टीका नेता तथा सुरक्षा निकायका व्यक्तिहरूको सम्पत्ति छानबिन नगरी पुराना दलका नेताहरूमाथि मात्रै लक्षित गरेर कारबाही गर्ने नीति अपनाएको दाबी गरे ।
ओलीले सम्पत्ति छानबिन आयोग गठनमार्फत राज्यले छानीछानी कारबाही गर्ने प्रयास भइरहेको भन्दै त्यस्ता आयोग स्वीकार्य नहुने बताए । उनले आफूलाई यस्ता प्रक्रियामा बयान दिनुपर्ने अवस्था आए पनि नदिने अडान व्यक्त गरे ।
“अरुले बयान दिए पनि मचाहिँ बयान दिन्नँ, सम्पत्ति विवरण पनि भरेर पठाउँदिनँ, जे गर्न सक्छ गरोस्,” ओलीले भने, “यो राज्य राज्य होइन, यो पूर्वाग्रहको पोको हो।”
उनले सरकारलाई प्रतिशोधको राजनीति त्यागेर संविधानअनुसार जिम्मेवार ढंगले अघि बढ्न सुझाव पनि दिएका छन् ।
