काठमाडाैँ । खाद्य प्रविधि तथा गुण नियन्त्रण विभागले गुनासोका आधारमा गरेको आकस्मिक बजार अनुगमनका क्रममा दुई खाद्य व्यवसायमा अनुगमन तथा कारबाही गरिएको जनाएको छ।
विभागले र्यापिड रेस्पोन्स मोडालिटी अन्तर्गत प्राप्त उजुरीको सम्बोधन गर्दै खाद्य स्वच्छता तथा गुणस्तर ऐन, २०८१ बमोजिम निरीक्षण गरेको हो।
अनुगमनका क्रममा नागार्जुन–१०, स्युचाटारस्थित शुभ श्री किराना स्टोर मा उजुरीमा उल्लेख गरिएको म्याद नाघेको क्रीम बेल फ्रोजन डेजर्ट भने फेला परेन। तर, म्याद सकिन लागेको एक थान (१०५ मिलिलिटर) क्रीम बेल फ्रोजन डेजर्ट (ब्याच नं. A 737, उत्पादन मिति २१ जुलाई २०२५, उपभोग्य मिति २० जुलाई २०२६) भेटिएको विभागले जनाएको छ।
उक्त पसलमा खाद्य अनुमति पत्र नलिएका तथा पूर्ण लेबल विवरण नभएका खाद्य पदार्थहरूको खरिद–विक्री नगर्न निर्देशन दिइएको छ। साथै, फ्रोजन डेजर्टको नमुना प्रयोगशाला परीक्षणका लागि संकलन गरिएको छ।
त्यस्तै, काठमाडौं–१० बानेश्वरस्थित श्री शिव फुड्स प्रा. लि. (शाखा कार्यालय) मा गरिएको अनुगमनमा उजुरीअनुसार भटुरेमा अखाद्य वस्तु भेटिएन। तर सरसफाइको अवस्था सन्तोषजनक नभएको, पेस्ट कन्ट्रोल प्रभावकारी नभएको, र पकाइएका केही खाद्य वस्तु खुल्ला रूपमा राखिएको पाइएको विभागले जनाएको छ।
त्यहाँ प्रयोग गरिएको तेलको टिपीएम परीक्षण गर्दा १२ र २३ देखिएपछि सो तेल नष्ट गरिएको पनि उल्लेख छ।
विभागले भान्साको सरसफाइ सुधार गरी आवश्यक प्रमाण तथा कागजातसहित पेस्ट कन्ट्रोल रिपोर्ट एक हप्ताभित्र पेश गर्न सम्बन्धित व्यवसायलाई निर्देशन दिएको छ। विभागले बजारमा उपभोक्ता स्वास्थ्य सुरक्षित राख्न यस्ता अनुगमन कार्य निरन्तर जारी रहने जनाएको छ।
